काठमाडौँ गोर्खाज विजयी

१७ कार्तिक, हेटौंडा । काठमाडौँ गोर्खाजले कर्णाली याक्सविरुद्ध सानदार जित निकालेको छ । कीर्तिपुरस्थित त्रिवि मैदानमा नेपाल प्रिमियर लिग (एनपीएल) अन्तर्गत सोमबार भएको खेलमा टस जितेर पहिला बलिङ गरेको काठमाडाैँ चार विकेटले विजयी भएको हो ।
शुरुमा ब्याटिङ गरेको कर्णाली याक्सले दिएको १८१ रनको लक्ष्य काठमाडौँले दुई बल बाँकी हुँदा छ विकेटको क्षतिमा पूरा गरेको हो ।
काठमाडौँको जितमा कप्तान करण केसीले विष्फोटक ब्याटिङ गर्दै २० बलमा ४४ रन जोडे । उनले तीन छक्का र चार चाैका हिर्काए । उसका लागि रसिद खानले अर्धशतक बनाए। उनले ३२ बल खेल्दा तीन चौका र दुई छक्का हिर्काएर ५० रन पूरा गरेका हुन् ।
अन्तिममा विष्फोटक ब्याटिङ गर्दै काठमाडाैँका जहानदाद खानले १० बलकाे सामना गर्दा दुई छक्का र एक चाैकाको मद्दतमा २२ रन बनाए । उसका लागि ओपनर डेबिड वार्नरले १० बलमा १६ रन बनाउँदा माेहमद आदिल आलमले २० रन थपे । स्मित पटेलले ९ रन जोड्दा भीम सार्की ५ रनमा आउट भए ।
काठमाडाैँविरुद्ध कर्णालीका कप्तान सोमपाल कामी र हुसेन तलातले दुईदुई विकेट हात पार्दा मार्क वाट र नन्दन यादवले एकएक विकेट लिए ।
कर्णालीले ६ विकेटको क्षतिमा पूरै २० ओभर खेल्दै १८० रन बनाएको थियो।
कर्णालीका लागि ओपनर आरिफुल इस्लामले सर्वाधिक ४४ रन बनाए । २२ बलको सामना गर्दा उनले पाँच चौका र तीन छक्का प्रहार गरे । त्यसैगरी हसन तलातले ३० बलमा ४० रन बनाउँदा पवन सरार्फले नटआउट ३० रन बनाए ।
त्यसैगरी कर्णालीका लागि गुल्सन झाले १२ बलमा दुई छक्काको मद्दतमा २० रन जोडे भने मार्क वाटले २० बल खेलेर १७ रन बनाए । आजको खेलमा दिपक डुम्रे भने ८ रन बनाउँदा आउट भएका थिए । कप्तान सोमपाल कामी दुई बलको सामना गर्दा १ रनमा सीमित भए ।
कर्णालीलाई सस्तैमा रोक्न काठमाडौँका कप्तान करण केसीले दुई विकेट हात पार्दा साहब आलम, जहानदाद खान, देव साह र सन्तोष यादवले एकएक विकेट हात पारे ।
कर्णाली यसअघिका दुई खेलमा जित्दै चार अंक जोडेर शीर्ष स्थानमा छ । पहिलो खेलमा पराजित काठमाडौँले पहिलो जित निकाल्दै दुई अंक जोडेको हो ।