३ नम्बर प्रदेशको नीति तथा कार्यक्रम बैशाख ११ मा आउने

२९ चैत, हेटौँडा । ३ नम्बर प्रदेशको नीति तथा कार्यक्रम बैशाख ११ गते आउने भएको छ । विहिबार बेलुका सम्पन्न ३ नम्बर प्रदेश मन्त्रीपरिषद बैठकको निर्णयबारे जानकारी दिंदै प्रदेश सरकारका प्रवक्ता एवं आर्थिक मामिला तथा योजनामन्त्री कैलाशप्रसाद ढुंगेलले यस्तो जानकारी दिएका हुन् । 
बैशाख ११ गते प्रदेश प्रमुख अनुराधा कोइरालाको सम्बोधनसंगै प्रदेश सरकारको नीति तथा कार्यक्रम आउने उनले जानकारी दिए । बैठकमा नीति तथा कार्यक्रमबारे छलफल भएको भन्दै ढुंगेलले कृषि, पर्यटन लगायतका विषय प्राथमिकतामा रहेको जानकारी दिए । बैठकबाट ७ वटा निर्णय भएको जानकारी प्रवक्ता ढुंगेलले दिए । बैठकले प्रदेशसभा सदस्यहरुको मर्यादाक्रम प्रतिनिधि र राष्ट्रियसभापछि निर्धारण गरेको छ भने प्रदेशसभा सचिवको योग्यता, काम, कर्तव्य र अधिकार सम्बन्धमा व्यवस्था गर्न बनेको विधेयक स्विकृत गरेको छ । 
त्यस्तै, सवारी साधन खरिद मापदण्डसम्बन्धी विधेयक, प्रादेशिक दुग्ध विकास बोर्ड गठन ऐन २०७४ सम्बन्धी विधेयक र प्रदेशको संचित कोष कार्यविधिसम्बन्धी विधेयक बैठकबाट स्विकृत भएको छ । बैठकले आकस्मिक कोष २०७४ सम्बन्धी विधेयक र विनियोजन ऐन २०७४ सम्बन्धी विधेयकको अवधारणापत्र स्विकृति गरेको छ ।