हेटौँडामा शुभकामना विराट महायज्ञ शुरु

१ बैशाख, हेटौँडा । हेटौँडा–१० मा रहेको गोरक्षेश्वर दिव्यधाममा शनिबारदेखि बैशाख ७ गतेसम्म सामाजिक सद्भाव अभिबृद्धिका लागि महायज्ञ शुरु भएको छ । 
नयाँ बर्ष शुभकामना पञ्चबर्षीय विराट महायज्ञ आयोजक मूल समारोह समितिले महायज्ञको ३ नम्बर प्रदेशका मूख्यमन्त्री डोरमणी पौडेलले उद्घाटन गरेका हुन् । कार्यक्रममा बोल्दै मूख्यमन्त्री पौडेलले स्वतन्त्र रुपमा धर्म मान्न पाउनुपर्नेमा जोड दिए । उनले कर बलले धर्म परिवर्तनको विरोध गर्नुपर्ने बताउँदै आस्था र विश्वासलाई कसैले रोक्न नसक्ने धारणा राखे । आफुहरुले पनि विगतमा धर्म मान्नु हुँदैन भनेपनि रोक्न नसकेको स्मरण गर्दै उनले आस्था र विश्वासमा कसैको अवरोध हुन नसक्ने बताए । सकारात्मक काम नै धर्म भएको भन्दै सकारात्मक कामले देश समृद्धि हुने मूख्यमन्त्री पौडेलको भनाई छ ।
महायज्ञ मूल समारोह समितिका संयोजक अजेयराज सुमार्गीको सभाध्यक्षतामा भएको कार्यक्रममा राष्ट्रिय सभा सदस्यहरु रामनारायण विडारी, रामचन्द्र राई, ३ नम्बर प्रदेश कांग्रेस संसदीय दल नेता ईन्द्रबहादुर बानियाँ, प्रदेशसभा सदस्यहरु गिता वाग्ले, कुमारी मोक्तान, पूर्व मन्त्री कर्णबहादुर थापा, १० नम्बर वडा सदस्य ईन्द्र नेपाल, कथा वाचक देवीप्रतिभा पराजुली, नेपाल बार एशोसियसनका पूर्व अध्यक्ष विश्वकान्त मैनाली, नारायणी यातायात व्यवसायी संघका महासचिव सरोज खनाल, ब्रम्हकुमारी राजयोग हेटौँडाकी संचालिका सुशिला दिदी, महायज्ञ मूल समारोह समितिका महासचिव ह्याग्रिव आचार्य लगायतले मन्तव्य व्यक्त गर्नुभएको थियो ।
यसअघि विहान ५० हजार भक्तजनको सहभागितामा गोरक्षेश्वर दिव्यधाम राप्तितटबाट शुरु भई मेनरोड, उद्योग बाणिज्य संघ चोक, संगम चोक, स्कूलरोड हुँदा बजार परिक्रमा गरी कलश यात्रा महायज्ञस्थलमा पुगेको थियो ।