महायज्ञमा भक्तजनको सहभागिता बढ्दो

२ बैशाख, हेटौँडा । हेटौँडा–१० मा रहेको गोरक्षेश्वर दिव्यधाममा शनिबारदेखि शुरु भएको नयाँ बर्ष शुभकामना पञ्चबर्षीय विराट महायज्ञमा भक्तजनहरुको सहभागिता बढ्दो छ । बैशाख ७ गतेसम्म सामाजिक सद्भाव अभिबृद्धिका लागि महायज्ञमा मकवानपुरका साथै छिमेकी जिल्लाहरुबाट समेत भक्तजनहरुको सहभागिता बढिरहेको हो । 
नयाँ बर्ष शुभकामना पञ्चबर्षीय विराट महायज्ञ आयोजक मूल समारोह समितिका अनुसार महायज्ञमा कथाश्रवणका लागि मकवानपुरका विभिन्न क्षेत्रका साथै चितवन, बारा, पर्सा, रौटहटसम्मका भक्तजनहरुको सहभागिता रहेको छ । प्रत्येक ५ बर्षमा हुने महायज्ञमा सामाजिक, धार्मिक, राजनीतिक एवं आर्थिक क्षेत्रका व्यक्तित्वको समेत उपस्थिति रहेको महायज्ञ मूल समारोह समितिका संयोजक अजेयराज सुमार्गीको भनाई छ । सबै क्षेत्रलाई एकताको सुत्रमा बाँध्ने अवसरको रुपमा महायज्ञलाई लिईएको उनको भनाई छ । 
५० हजारभन्दा बढि भक्तजनको सहभागितामा कलशयात्रा सहित शुभारम्भ भएको महायज्ञमा दैनिक सामुहिक भोजन, झाँकी, भजन लगायतका आकर्षण रहेको छ । महायज्ञमा संस्कृति संरक्षण गर्ने उद्धेश्यले खैजडी भजन प्रतियोगिता शुरु भएको छ । प्रतियोगिता महायज्ञ अवधिभर संचालन हुने महायज्ञ मूल समारोह समितिका महासचिव हयाग्रिव आचार्यले बताए । प्रतियोगिताको पहिलो दिन श्रीराम हनुमान आरधाना मण्डल बसामाडि र चुच्चेखोला लोक खैजडी भजन समूह हेटौँडा–६ बीच प्रतिष्पर्धा भएको आचार्यले जानकारी दिए ।