चौलागाई बन्ने भए प्रजाका अभिभावक

४ बैशाख, हेटौँडा । जिल्ला युवा समिति मकवानपुरले सबै बालबालिकालाई विद्यालय शिक्षाको अवसर उपलव्ध गराउन सबैसंग आग्रह गरेको छ ।

आज कार्यालयमा पत्रकार सम्मेलन गरी समितिका अध्यक्ष सन्तोष चौलागाईले सरकारले अभियानको रुपमा संचालन गरेको विद्यार्थी भर्ना अभियानलाई समर्थन गर्दै आफुहरु पनि अभियानमा जोडिएको बताए । उनले मकवानपुरमा विद्यालय जाने उमेरका २ प्रतिशत बालबालिका विद्यालय बाहिर रहेको र विद्यालय छोड्ने दर १२ प्रतिशत रहेको भन्दै विद्यार्थी भर्ना अभियानलाई प्रभावकारी बनाउन सबैसंग आग्रह गरे । उनले विद्यालय नगएका बालबालिकाको खोजी गरी सामुदायिक विद्यालयमा भर्ना गराई अभिभावकत्व ग्रहण गर्न समेत सबैसंग अनुरोध गरे । 

युवा समितिका अध्यक्ष चौलागाईले आफुले मनहरीको रोटरी राष्ट्रिय माविमा स्थानीय सिर्जना प्रजालाई भर्ना गराई अभिभावकत्व ग्रहण गर्ने बताए । पत्रकार सम्मेलनमा युवा समितिका सदस्य रामकृष्ण थापा, अशोक सारु मगर, नानीमैया विष्ट लगायतको सहभागिता रहेको थियो । यसअघि बकैया गाउँपालिकाका अध्यक्ष दामोदर खनालले आफ्ना छोरा र हेटौँडा उपमहानगरपालिकाका प्रमुख हरिबहादुर महतले नातिनिलाई सामुदायिक विद्यालयमा भर्ना गराएका थिए ।