मूख्यमन्त्री पौडेल बने २ बालबालिकाको अभिभावक

५ बैशाख, हेटौँडा । ३ नम्बर प्रदेशका मूख्यमन्त्री डोरमणी पौडेल २ बालबालिकाको अभिभावक बनेका छन् । बुधबार उनले दुई बालबालिकाको अभिभावकत्व ग्रहण गरेका हुन् ।
मकवानपुरको मनहरी गाउँपालिका वडा नम्बर ६ स्थित राष्ट्रिय माध्यमिक विद्यालय सुनाचुरीमा विद्यार्थी भर्ना अभियान शुभारम्भ गर्दै मूख्यमन्त्री पौडेलले एक बालक र एक बालिकाको अभिभावकत्व ग्रहण गरेका छन् । निम्न आर्थिकस्तरका परिवारका स्थानीय जेसिका प्रजा र सन्जित ब्लोनको अभिभावकत्व ग्रहण गर्दै मूख्यमन्त्री पौडेलले विद्यालय जान नसकेका बालबालिकालाई हरेक सचेत नागरिकले जिम्मा लिएर विद्यालय भर्ना गराउनुपर्नेमा जोड दिए । उनले आफुले अभिभावकत्व ग्रहण गरेका बालबालिकाको सबै खाले शैक्षिक गतिविधिमा सहयोग गर्ने प्रतिवद्धता समेत व्यक्त गरे । 
भर्ना अभियान अन्तरगत सोही विद्यालयमा प्रदेशसभा सदस्य ओम घलानले स्थानीय सुनिल चेपाङ र मनहरी–४ को महेन्द्र किरण माविमा प्रतिनिधि सभा सदस्य विरोध खतिवडाले सविन थिङ र विश्वास थोक्राको अभिभावकत्व ग्रहण गरेका छन् । यसअघि विद्यालय भर्ना अभियान अन्तरगत हेटौँडा उपमहानगरपालिकाका प्रमुख हरिबहादुर महतले आफ्नी नातिनि र बकैया गाउँपालिकाका प्रमुख दामोदर खनालले आफ्नो छोरालाई सामुदायिक विद्यालयमा भर्ना गराएका थिए ।