प्रदेश सभामा कोइरालाले गरिन् यस्तो सम्बोधन 

११ बैशाख, हेटौँडा । ३ नम्बर प्रदेशकी प्रदेश प्रमुख अनुराधा कोइरालाले मंगलबार ३ नम्बर प्रदेशसभा बैठकलाई सम्बोधन गरेकी छिन् ।
प्रदेशसभा बैठकमा बोल्दै कोइरालाले देश र प्रदेशको विकासका लागि विभाजित नभई अघि बढ्नुको विकल्प नरहेको बताईन् । उनले आपसी एकता र समझदारी कायम गर्दै विकास र समृद्धिको चरणमा अघि बढ्नुपर्नेमा जोड दिईन् । भुकम्प गएको ३ बर्ष भईसक्दा पनि ३० प्रतिशत भुकम्प पीडितले मात्रै आंशिक अनुदान पाएको भन्दै उनीहरुलाई यथाशिघ्र छानामुनी ल्याउनु जरुरी रहेको प्रदेश प्रमुख कोइरालाको भनाई छ । 
उनले आगामी आर्थिक बर्षको नीति तथा कार्यक्रमले प्रदेश विकासको व्यवस्थित अवधारणा अघि सार्ने बताईन् । मंगलबार नै बसेको दोस्रो बैठकमा मूख्यमन्त्री डोरमणी पौडेलले प्रदेश प्रमुखको सम्बोधनको प्रति टेवल गरेका थिए भने प्रदेशसभा सदस्य रामेश्वर फुयालले प्रदेश प्रमुख कोइरालाप्रति धन्यवाद प्रस्ताव राखेका थिए । धन्यवाद प्रस्ताव सर्वसम्मत पारित भएको थियो । 
बैठकमा सभामुख सानुकुमार श्रेष्ठले प्रदेश सदस्यहरुको मर्यादाक्रम प्रतिनिधि र राष्ट्रिय सभापछि हुने भनि मन्त्रीपरिषद बैठकले गरेको निर्णय प्रधानमन्त्री तथा मन्त्रीपरिषद कार्यालयमा पठाएको मूख्यमन्त्री तथा मन्त्रीपरिषद कार्यालयबाट प्राप्त पत्र पढेर सुनाउनु भएको थियो । प्रदेशसभा बैठक बैशाख १३ गतेसम्म ११ बजेसम्मका लागि स्थगित भएको छ ।