सिण्डिकेट अन्त्य गरेरै छाड्ने गृहमन्त्री बादलको चेतावनी 

१८ बैशाख, हेटौँडा । गृहमन्त्री रामबहादुर थापा 'बादल' ले सिण्डिकेट अन्त्य गरेरै छाड्ने चेतावनी दिएका छन् । उनले सिण्डिकेट र भ्रष्टाचार अन्त्य गर्न सरकार अग्रसर भएको बताएका हुन् । 

३ नम्बर प्रदेशस्तरीय सुरक्षा गोष्ठीमा सहभागी हुन मंगलबार हेटौँडा आईपुगेका गृहमन्त्री थापाले संचारकर्मीहरुसंग कुरा गर्दै भ्रष्टाचार र सिण्डिकेट विकाससंग जोडिएको मुद्धा भएकाले अन्त्यका लागि सरकार अग्रसर रहेको बताए । उनले भ्रष्टाचार, सिण्डिकेट र तस्करी विकासका लागि बाधक रहेको भन्दै सरकार यसलाई समाप्त पार्न सरकार अग्रसर रहेको बताए । मन्त्री बादलले केही व्यवधान र विलम्ब भएपनि छिट्टै दुई पार्टी एकिकरण हुने दावि गरे ।

उनले भारतीय प्रधानमन्त्री नरेन्द्र मोदीको नेपाल भ्रमणले दुई देशबीचको सम्बन्ध थप सुदृढ हुने बताए । छिट्टै प्रधानमन्त्री केपि शर्मा ओलीले अर्को छिमेकी देशको भ्रमण गर्ने भन्दै उनले दुुई छिमेकीसंगको सुदृढ सम्बन्धले देश विकासमा सहयोग पुग्ने उनको भनाई छ । उनले बाम गठबन्धन नेतृत्वको सरकारको मूख्य जनादेश विकास र समृद्धि भएको भन्दै यसका लागि सुशासन, सुरक्षा र स्थानीयत्व आवश्यक रहेको बताए । उनले सुरक्षा अवस्था सदृढ बनाउनका लागि यस्ता प्रदेशस्तरीय गोष्ठी भईरहेको समेत जानकारी दिए ।