एन्फाको निर्वाचन वैशाख २२ गते हुने पक्का

२१ बैशाख, हेटौँडा । अखिल नेपाल फुटबल संघ (एन्फा)को निर्वाचन यही वैशाख २२ गते शनिबार नै हुने पक्का भएको छ । काठमाडौं जिल्ला अदालतमा परेको रिटबारे अन्तरिम आदेश जारी गर्नु नपर्ने अदालतले भनेसँगै निर्वाचन हुने पक्का भएको हो ।
शनिबारका लागि तोकिएको एन्फाको निर्वाचन प्रक्रिया विधानसम्मत् नभएको उल्लेख गर्दै काठमाडौं जिल्ला फुटबल संघका अध्यक्ष विराटजंग शाहीसहितले रिट दायर गरी निर्वाचन रोक्न अन्तरिम आदेशको मागसहित बुधबार काठमाडौं जिल्ला अदालतमा रिट दायर गरेका थिए ।
रिट राष्ट्रिय खेलकुद परिषद (राखेप), एन्फा, एन्फाको निर्वाचन समितिलाई विपक्षी बनाएर दायर गरिएको थियो ।
काठमाडौं जिल्ला अदालतका न्यायाधीश रमेशराज पोखरेलको एकल इजलासले बिहीबार ‘उच्च अदालत पाटनको आदेशले स्थगन भएको निर्वाचनअगाडि थालनी गरेको निर्वाचन प्रक्रियाअनुरुप पुनः मिति तोकी निर्वाचन गराउन निर्वाचन समितिले सक्ने देखिएको र उम्मेदवारको अन्तिम नामावलीसमेत प्रकाशित भइसकेकाले अन्तरिम आदेश जारी गर्न परेन’ भन्ने निर्णय गरेको छ ।
जिल्ला अदालतले राखेपसहित विपक्षीहरुलाई १५ दिनभित्र लिखित जवाफ पेस गर्न आदेश पनि गरेको छ । यसअघि, चैत १४ का लागि तय भएको निर्वाचन उच्च अदालत पाटनको अन्तरिम आदेशका कारण स्थगित भएको थियो ।
एन्फाका वरिष्ठ उपाध्यक्ष मणि कुँवर र पूर्वउपाध्यक्ष कर्मा छिरिङ शेर्पाको प्यानल एन्फा निर्वाचनमा रहेको छ ।