अपराध गरेर भाग्न खोजे इन्काउन्टर गरिन्छ : एसपी श्रेष्ठ 

२४ बैशाख, हेटौंडा । भर्खरै सरुवा भई आएका मकवानपुरका प्रहरी उपरीक्षक लोकेन्द्र श्रेष्ठले आपराध गरेर भाग्न खोज्नेलाई ‘इन्काउन्टर’ गर्ने चेतावनी दिएका छन् । उनले प्रधानमन्त्रीदेखि प्रहरी प्रमुखबाट समेत अपराधीलाई कुनै पनि हालतमा छुटकारा नदिन निर्देशन पाएको भन्दै अपराध गरेर भाग्न खोज्नेलाई इन्काउन्टर गर्ने चेतावनी दिएका हुन् । 
प्रहरीले अपराध गरेको पुष्टी भएर भाग्न खोजे इन्काउन्टर गर्ने भन्दै उनले आत्मसमर्पण गर्नेलाई भने कानूनी प्रक्रिया अनुसार कारवाही हुने बताए । हेटौँडाका पत्रकारहरुसंगको परिचयात्मक कार्यक्रममा बोल्दै श्रेष्ठले अपराध नियन्त्रण, लागुऔषध नियन्त्रण, महिला हिंसा न्यूनिकरण, फरार अभियुक्त पक्राउ लगायतका काम आप्mनो प्राथमिकतमा रहेको भन्दै दुई साताभित्र जिल्लामा खटिएका प्रहरीको व्यवहारमा समेत आमूल परिवर्तन देखाउने दावि गरे । 
उनले राम्रो काम गर्ने प्रहरीलाई पुरस्कार र नराम्रो गर्नेलाई कारवाही गर्न आफु पछि नहट्ने बताउँदै सदाचार प्रहरीबाटै शुरु गर्ने बताए । जिल्ला प्रहरी कार्यालय परिसरमा धुमपान र मध्यपान गर्नेलाई प्रवेश निषध गरिने समेत उनले बताए । यसअघि मध्य क्षेत्रीय प्रहरी कार्यालय हेटौँडामा रहेका उनी केही समयअघि काठमाण्डौंमा भएका थिए । मकवानपुरका प्रहरी उपरिक्षक ३३ किलो सुनकाण्डमा मुछिएर निलम्बन भएपछि श्रेष्ठ मकवानपुरमा काज सरुवा भई आएका हुन् । 
उनले सोमबार मकवानपुरका विभिन्न इकाईका प्रमुखहरुलाई सामुहिक निर्देशन दिएका छन् । इकाई प्रमुखहरुमा नागरिकसंगको सम्बन्ध सुधार र अपराधमा शुन्य सहनशिलताको नीति अवलम्बन गर्न निर्देशन दिएको जनाईएको छ ।