पत्रकार महासंघ प्रदेश कार्यसमितिको हेटौँडामा सपथ

२६ बैशाख, हेटौँडा । नेपाल पत्रकार महासंघ ३ नम्बर प्रदेशको निर्वाचनबाट निर्वाचित कार्यसमितिले बुधबार सपथग्रहण गर्ने भएको छ । 
बैशाख २२ गते सम्पन्न निर्वाचनमा निर्वाचित कार्यसमितिले हेटौँडामा एक कार्यक्रमकाबीच सपथग्रहण गर्ने भएको हो । नेपाल पत्रकार महासंघको व्यवस्थापनमा सपथग्रहण, पदस्थापना तथा बधाई ज्ञापन कार्यक्रम हुन लागेको पत्रकार महासंघ मकवानपुरका सचिव गणेशदर्पण अधिकारीले जानकारी दिए । निर्वाचनमा प्रदेश अध्यक्षमा गिरिजा अधिकारीलाई पराजित गर्दै प्रताप विष्ट विजयी भएका थिए । 
खुला उपाध्यक्षमा यदुनाथ गौतम, महिला उपाध्यक्षमा नानीमैया कार्की (सम्झना), महासचिवमा कृष्ण सारु मगर, खुला सचिवमा केशवप्रसाद हुमागाई, समावेशी सचिवमा राजन विक र कोषाध्यक्षमा सीताराम अधिकारी निर्विरोध चयन भएका थिए ।
खुला सदस्यमा रामचन्द्र नेपाल, प्रविण बराल, रामकान्त पौडेल, रामहरि गजुरेल, युवराज पुरी र रबिन्द्र गौतम निर्विरोध भए भने मधेशी सदस्यमा कोमलचन्द्र भगत, दलित सदस्यमा मदन विश्वकर्मा, महिला सदस्यमा नानीमैया बिष्ट, जानुका न्यौपाने र शर्मिला उप्रेती, अल्पसंख्यक सदस्यमा बद्री नयाँघरे र आदिवासी जनजाति सदस्यमा ईश्वरकुमार जोशी र जीवन श्रेष्ठ निर्विरोध भएका थिए । देश संघीय संरचनामा गएपछि पहिलो पटक प्रदेशस्तरीय संरचनामा पत्रकार महासंघको निर्वाचन भएको थियो ।