सिण्डिकेट अन्त्यमा संचारकर्मीको भूमिका अग्रणी : मूख्यमन्त्री पौडेल

२६ बैशाख, हेटौँडा । ३ नम्बर प्रदेशका मूख्यमन्त्री डोरमणी पौडेलले देशमा रहेको यातायात क्षेत्रको सिण्डिकेट खारेज गर्न संचारकर्मीहरुको भूमिका अग्रणी रहेको बताएका छन् । 
नेपाल पत्रकार महासंघ ३ नम्बर प्रदेशका नवनिर्वाचित कार्यसमितिको सपथग्रहण कार्यक्रममा बोल्दै मूख्यमन्त्री पौडेलले विगत लामो समयदेखि प्रयास भएपनि अहिले यातायात क्षेत्रको सिण्डिकेट अन्त्य गर्न संचारकर्मीको भूमिका कारण सम्भव भएको बताए । संचार क्षेत्रको सकारात्मक भूमिका रहँदा देशमा रहेको भ्रष्टाचार र विकृति अन्त्य गर्न सकिनेमा जोडि दिंदै उनले ३ नम्बर प्रदेशलाई भ्रष्टाचारमुक्त प्रदेशको रुपमा स्थापित गर्न पनि साथ दिन आग्रह गरे । उनले भ्रष्टाचारप्रति शुन्य सहनशिलताको नीति प्रदेश सरकारको रहेको बताए । यो बर्षलाई उद्योग बर्षको रुपमा घोषणा गर्ने तयारीमा प्रदेश सरकार रहेको भन्दै उद्योग स्थापना गर्न चाहनेलाई कर छुट लगायतका सुविधाको व्यवस्था हुने मूख्यमन्त्री पौडेलले बताए । उनले २ बर्षभित्र सुरुङमार्गबाट काठमाण्डौं पुगिने पनि दावि गरे । 
नेपाल पत्रकार महासंघका प्रदेश संयोजक द्वारिका काफ्लेको अध्यक्षतामा भएको कार्यक्रममा महासंघका महासचिव रमेश विष्ट, जिल्ला समन्वय समिति मकवानपुरका प्रमुख रघुनाथ खुलाल, हेटौँडा उपमहानगरपालिकाका प्रमखु हरिबहादुर महत, उद्योग संघ मकवानपुरका अध्यक्ष नवराज अर्याल, नेपाल पत्रकार महासंघ मकवानपुरका अध्यक्ष हरि हुमागाई, पूर्व अध्यक्ष नवराज शर्मा, महासंघ ३ नम्बर प्रदेश अध्यक्षका उम्मेदवार गिरिजा अधिकारी लगायतले मन्तव्य व्यक्त गरेका थिए ।