काँग्रेसको अर्थनीतिमा अन्य पार्टी चलेका छन् : महत

२६ बैशाख, हेटौँडा । नेपाली कांग्रेस सहमहामन्त्री एवं पूर्व परराष्ट्रमन्त्री डा. प्रकाशशरण महतले नेपाली काँग्रेसको नीति र खुला अर्थनीतिमा नेपालका अन्य पार्टीहरु चलिरहेको बताएका छन् ।
नेपाली कांग्रेस ३ नम्बर प्रदेश संसदीय दलको संसदीय अभ्यास सम्बन्धी एकदिने अन्तरक्रिया कार्यक्रमको बुधबार काठमाण्डौंमा उद्घाटन् गर्दै डा. महतले अन्य पार्टीहरु काँग्रेसको विचार र अर्थनीतिमा चलेकाले काँग्रेस तल नपरेको बताए । उनले मतका हिसावले अहिले कांग्रेस केही पछि परेको भएपनि विचार र नीतिको दृष्टिकोणले सधै अघि रहेको बताए ।
देशका प्रमूख घटनाक्रमहरुमा कांग्रेसको नेतृत्वले नै यो सब सम्भव भएको बताउँदै डा. महतले संसदमा प्रस्तुत हुँदा प्रभावकारी र सशक्त ढंगले प्रस्तुत हुन प्रदेशसभा सदस्यहरुलाई निर्देशन दिए । उनले जहिले पनि जनताको हितमा काम गर्ने भएकाले प्रदेशसभामा पनि जनताका मुद्धामा सधै आवाज उठाउन प्रदेशसभा सदस्यहरुलाई सचेत गराएका छन् ।
३ प्रदेश संसदीय दलका नेता ईन्द्रबहादुर बानियाँको सभाध्यक्षतामा भएको कार्यक्रममा पार्टीका केन्द्रीय सहमहामन्त्री डा. महत र केन्द्रीय सदस्य रमेश प्रशिक्षण दिएका थिए ।
केन्द्रीय सदस्य लेखकले प्रदेशसभा बैठक संचालनमा दलको भूमिका, संसदमा राष्ट्रिय/अन्तर्राष्ट्रिय अभ्याससहितको बृत्तचित्र र डा. महतले प्रदेश आर्थिक प्रणाली, काँग्रेसले ४८ सालदेखि लिएको खुला अर्थनीति र आगामी दिनमा दलले खेल्नुपर्ने भूमिका बारेमा प्रदेश सांसदहरुलाई प्रशिक्षण दिएका थिए ।
प्रशिक्षणमा कांग्रेस ३ नम्बर प्रदेशका २१ जना प्रदेशसभा सदस्यको सहभागिता रहेको संसदीय दलका सदस्यसचिव निमा लामाले जानकारी दिए ।