सभापति छान्दै प्रदेश राजधानी अध्ययन समिति

३० बैशाख, हेटौँडा । ३ नम्बर प्रदेशको राजधानीबारे अध्ययन गर्न प्रदेशसभाबाट गठित समितिले आइतबार आफ्नो सभापति चयन गर्ने भएको छ । समिति गठन भएको दुई सातापछि समितिले आइतबार पहिलो बैठक बसी सभापति चयन गर्ने भएको हो ।
बैशाख १४ गतेको प्रदेशसभाको पहिलो अधिवेशनको अन्तिम बैठकबाट गठित समितिको बैठक दिउँसो ३ बजेपछि बस्ने भएको हो । पहिलो बैठकले १३ सदस्यीय समितिबाट सभापति चयन गर्ने र कार्यविधि बनाउने जनाईएको छ । समितिलाई कार्य प्रारम्भ गरेको ४५ दिनभित्र प्रतिवेदन बुझाउने अवधी दिईएको छ । समितिमा एमालेका तर्फबाट दिपक निरौला, सरस्वती बस्नेत, बिजय सुवेदी, वसन्त मानन्धर, डा.रामकुमार अधिकारी, माओवादी केन्द्रबाट विशाल खड्का, जगत सिंखडा, काँग्रसबाट छिरिङ दोर्जे लामा, प्रभात तामाङ, विवेकशिल साझाका बिराजभक्त श्रेष्ठ, नेमकिपाका सुरेन्द्रराज गोसाई, राप्रपाकी रिता माझी र राप्रपा प्रजातान्त्रिकबाट रिना गुरुङ छन् । 
प्रदेश राजधानीबारे छलफलका लागि काभ्रे, भक्तपुर रसुवा र नुवाकोटका प्रदेशसभा सदस्यले संयुक्त रुपमा प्रस्ताव दर्ता गरेपनि सभामुखले कार्यसूचिमा राख्न तत्परता नदेखाएपछि ३८ जना प्रदेशसभा सदस्यले निवेदन दर्ता गराएका थिए । त्यसपछि सभामुख सानुकुमार श्रेष्ठले अध्ययन समिति गठन गरेका थिए ।