प्रदेशसभामा विनियोजन विधेयकको सिद्धान्त र प्राथमिकता प्रस्तुत

१ जेठ हेटौँडा । ३ नम्बर प्रदेशको प्रदेशसभा बैठकमा आगामी आर्थिक वर्ष ०७५/०७६ को बजेटको सिद्धान्त र प्राथमिकता प्रस्तुत भएको छ ।

प्रदेशसभाको मंगलबार बसेको बैठकमा प्रदेश ३ का आर्थिक मामिला तथा योजनामन्त्री कैलाश ढुंगेलले विनियोजन विधेयकका सिद्धान्त र प्राथमिकता (कर प्रस्ताव बाहेक) पेश गरेका हुन्। आगामी बजेटमा भौतिक पूर्वाधार, कृषि, पर्यटन र जलविद्युतलाई प्राथमिकतामा राखेको ढुंगेलको भनाई छ। यसबारे जेठ ३ गतेदेखि प्रदेशसभा बैठकमा छलफल शुरु हुने सभामुख सानुकुमार श्रेष्ठले जानकारी दिए । बैठकमा सभामुख श्रेष्ठले प्रदेशसभा सदस्य हरिशरण लामिछानको निधनबारे सभालाई जानकारी दिएका थिए । यसअघि बसेको पहिलो बैठकमा प्रदेश प्रमुख कार्यालयबाट आएको अधिवेशन आव्हानको पत्र पढेर सुनाईएको थियो भने सहिदप्रति श्रद्धाञ्जली स्वरुप मौन धारण गरिएको थियो । बैठकमा प्रदेश प्रमुखको कार्यालयबाट आएको विधेयक प्रमाणीकरणसम्बन्धी पत्र पढेर सुनाईएको थियो । प्रदेश प्रमुख अनुराधा कोइरालाले प्रदेशसभा बैठकबाट पारित केही सार्वजनिक लिखत प्रमाणीकरणसम्बन्धी विधेयक, स्थानीय तहका पदाधिकारीहरुको सेवा सुविधा सम्बन्धी विधेयक र गाउँ/नगर सभा संचालनसम्बन्धी विधेयक प्रमाणिकरण गरेकी छिन् ।