अनियमितताको आशंका गर्दै सरकारको धारणा माग

२ जेठ, हेटौंडा । ३ नम्बर प्रदेशको सार्वजनिक लेखा समितिले सरकारले भैपरी आउने र विविध खर्च शीर्षकमा ठूलो रकम विनियोजन गरेको भन्दै अनियमितताको आशंका गरेको छ ।

समितिको बुधबार बसेको बैठकमा चालू अावका लागि प्रस्तुत अाय व्यय विवरणमा भैपरी आउने र विविध खर्च शीर्षकमा ठूलो रकम विनियोजन गरेकोमा अनियमितताको आशंका गरेको हो । समिति सभापति न्हुच्छे नारायण श्रेष्ठको अध्यक्षतामा बसेको बैठकमा सरकारको यसबारे धारणा माग्ने निर्णय गरेको छ । बैठकले प्रदेश नम्बर ३ का आर्थिक मामिला तथा योजना मन्त्री कैलाश ढुंगेललाई जेठ ४ गते समितिमा बोलाएर जानकारी लिने निर्णय गरेको सभापति श्रेष्ठले बताए । चालु आर्थिक लागि सरकारले ल्याएको आय/व्ययको अनुमानित विवरणमा भैपरी खर्च शीर्षकमा चालुतर्फ ३० करोड र पूँजीगततर्फ ३३ करोड ६० लाख विनियोजन गरेको छ । त्यस्तै बिबिध खर्च शीर्षकमा ६५ लाख विनियोजन गरेको थियो ।

समिति बैठकमा सदस्यहरूले कार्यकर्तालाई आर्थिक सहायता र चन्दाको नाममा रकम खर्च हुन सक्ने भन्दै सरकारको धारणा माग गरेको हो ।  
यस्तै, समितिको बार्षिक कार्यक्रम तथा बजेट खाका तयार गर्न रमेश पौड्यालको संयोजकत्वमा जीवन डंगोल, बेलीमाया घले, मुनु सिग्देल र रत्न ढकाल रहेको उपसमिति गठन गरेको छ ।