३ नम्बर प्रदेश परिषद बैठकमा १० बुँदे निर्णय

८ जेठ, हेटौँडा । ३ नम्बर प्रदेशको अस्थायी राजधानी हेटौँडामा जारी ३ नम्बर प्रदेश परिषद बैठक १० बुँदे निर्णय गर्दै मंगलबार सकिएको छ । 
बैठकले तीन वटै तहको सरकारको काम, कर्तव्य र अधिकार प्रष्ट पार्न कानून निर्माणका लागि संघीय सरकारलाई अनुरोध गर्ने, प्रदेश र स्थानीय तहलाई प्रदान गरेका अधिकारसंग बाझिएका संघीय कानून संशोधनका लागि संघीय सरकारलाई अनुरोध गर्ने,  प्राकृति स्रोत र साधनको बाँडफाँडको पद्धतिलाई बैज्ञानीक बनाई प्रदेश र स्थानीय तहलाई बढि राजस्व बाँडफाँड हुने व्यवस्थान मिलाउन आग्रह गर्ने, कर्मचारी समायोजन शिघ्र टुंग्याउन अनुरोध गर्ने, प्रदेश लोकसेवा आयोग गठन प्रक्रिया अघि बढाउन आवश्यक कानून निर्माणका लागि संघीय सरकारलाई अनुरोध गर्ने निर्णय गरेको छ । 
बैठकले प्रदेश नम्बर ३ मा ढुंगा, गिटि, बालुवा लगायतका प्राकृतिक स्रोतको उत्खनन र विक्रि वितरण सम्बन्धी कानून एवं प्रक्रिया र मापदण्ड निर्धारण गर्दा वातावरण अनुकुल हुने गरी व्यवस्था मिलाउने लगायतका निर्णय गरेको छ ।  बैठकमा ३ नम्बर प्रदेश अन्तरगतका १ सय १९ स्थानीय तहका प्रमुख र उपप्रमुखको सहभागिता रहेको थियो । कार्यक्रम ३ नम्बर प्रदेशका मूख्यमन्त्री डोरमणी पौडेलको अध्यक्षतामा समापन भएको थियो ।