शर्मालाई कृष्ण सेन इच्छुक पत्रकारिता पुरस्कार

१३ जेठ, हेटौँडा । क्रान्तिकारी पत्रकार संगठन, नेपाल मकवानपुर शाखाले स्थापना गरेको कृष्ण सेन इच्छुक स्मृति पत्रकारिता पुरस्कार पत्रकार नवराज शर्मालाई प्रदान गरिएको छ । 

इच्छुकको १६ औँ स्मृति दिवसका अवसरमा हेटौँडामा आइतबार पाँच हजार ५५५ रुपैयाँ राशीको पुरस्कार प्रदान गरिएको हो । जिल्लाका विविध सम्पर्क सूचनाहरू समेटेर तयार गरिएको फोन डायरीको समेत विमोचन गरिएको छ।  पुरस्कार वितरण समारोहमा बोल्दै कार्यक्रममा प्रमुख अतिथि प्रभात चलाउनेले कृष्ण सेन सांस्कृतिक योद्धा, लेखक, साहित्यकारका रूपमा नभई एक महान स्वप्न द्रष्टा भएको बताए ।

कार्यक्रममा बोल्दै पुरस्कृत हुने वरिष्ठ पत्रकार नवराज शर्माले कृष्ण सेन सबैको आदर्श भएको बताए। कृष्ण सेनले सधै आफूलाई जनताको पक्षमा उभ्याएको बताउँदै शर्माले सेनको जीवनबाट सबैले सिक्नुपर्ने बताए । नेपाल पत्रकार महासंघका प्रदेश ३ का अध्यक्ष प्रताप विष्टले संगठनले सही व्यक्तिलाई पुरस्कृत गरेको भन्दै जनताका पक्षमा कलम चलाएमा सम्मान पाइन्छ भन्ने कुराको अनुभूति बनाए । कार्यक्रममा प्रेस चौतारी, प्रेस युनियन, प्रेस सेन्टर, प्रेस सोसाइटी, मिडिया नेपाल, क्रियाशील पत्रकार महिला, तामाङ पत्रकार संघ, चलचित्र पत्रकार संघलगायतका प्रतिनिधिहरुको उपस्थिति रहेको थियो।