फेकोफन मकवानपुरको अध्यक्षमा चौलागाई

१६ जेठ, हेटौँडा । सामुदायिक वन उपभोक्ता महासंघ (फेकोफन) जिल्ला समन्वय समिति,मकवानपुरको अध्यक्षमा साधुराम चौलागाई निर्विरोध निर्वाचित भएका छन् ।
समितिको उपाध्यक्षमा गोपीमाया अधिकारी, सचिवमा लक्ष्मी पुडासैनी र कोषध्यक्षमा बलराम अधिकारी चयन भएका छन । सामुदायिक वन उपभोक्ता महासंघ,नेपाल मकवानपुरको आज सम्पन्न भएको प्रथम अधिवेशनले चौलागाईको नेतृत्वमा २४ सदस्यीय समिति गठन गरिएको हो ।
जिल्ला समन्वय समिति मकवानपुरकी उपप्रमुख भगवती पुडासैनीको प्रमुख आतिथ्यता एवम फेकोफन जिल्ला अध्यक्ष पञ्चमाया स्याङतानको अध्यक्षतामा कार्यक्रम भएको थियो ।
कार्यक्रममा सामुदायिक वन उपभोक्ता महासंघ,नेपालकी केन्द्रीय महासचिव भारती पाठक, केन्द्रीय सदस्य शान्ता न्यौपाने जिल्ला वन अधिकृत प्रल्हाद प्रसाद धिताल,जिल्ला समन्वय समिति ललितपुरका अध्यक्ष प्रेम घिमिरे,सामुदायिक वन उपभोक्ता महासंघ मकवानपुरका पूर्व अध्यक्ष पुष्पराज पराजुली, सचिवालय सदस्य रामहरी चौलागाई, फेकोफन, हेटौडा उपमहानगरपालिकाका अध्यक्ष शम्भु प्रसाद न्यौपाने, न्यायिक समितिका संयोजक अर्जुन गौतम लगायतकाले मन्तव्य व्यक्त गरेका थिए ।
फेकोफन मकवानपुरमा २ सय ४० वटा सामुदायिक वन समूहहरु आवद्ध रहेका छन् ।