कृष्णगोपालले हेटौंडेलीको मन भुलाउने

९ असोज, हेटौँडा । पुराना एवं चर्चित गायक कृष्णगोपाल सिंहले फेरि एक पटक हेटौँडाका संगीत पारखीको मन भुलाउने भएका छन् । होटल एशोसियसन मकवानपुरले दशैं, तिहार र छठको उपलक्ष्यमा गर्न लागेको सांस्कृतिक कार्यक्रममा सिंहले आफ्नो प्रस्तुतिमार्फत मनोरन्जन प्रदान गर्ने भएका हुन् । 
सल्लोनी एल्बमको ‘गुड्यो मोटर सुसाउँदै, तन्नेरीको मन भुलाउँदै बाईरोडमा’ लगायतका कर्णप्रिय गीतका गायक सिंह यसअघि भएको हेटौँडा आईडलका निर्णायक पनि हुन् । असोज १५ गते सांस्कृतिक कार्यक्रमको तेस्रो संस्करण हुने आयोजकले आइतबार पत्रकार सम्मेलन गरी जानकारी दिएको हो । सांस्कृति कार्यक्रममा कृष्णगोपालका साथै सिर्जना कला केन्द्रका कलाकारहरुले समेत मनोरन्जन प्रदान गर्ने होटल एशोसियसन मकवानपुरका अध्यक्ष भागिरथ शर्माले बताए । 
शाकाहारी र मांसाहारी परिकारका साथ हुने सांस्कृतिक कार्यक्रमका लागि  १२ सय रुपैँयाको टिकटको व्यवस्था गरिएको छ । २०७० सालदेखि बर्षेनी भईरहेको कार्यक्रम २०७२ सालमा भुकम्पका कारण हुन सकेको थिएन । स्थानीय कला संस्कृतिको प्रवद्र्धनसँगै चाडपर्वको अवसरमा शुभचिन्तक, मित्रजनसँग रमाईलो गर्ने अवसर जुटाउन कार्यक्रम गरिएको आयोजकको दावि छ । पत्रकार सम्मेलनमा महासचिव शंकरलाल श्रेष्ठ, कोषाध्यक्ष विजय श्रेष्ठसहित पदाधिकारीको सहभागिता रहेको थियो ।