यस्तो छ ३ नम्बर प्रदेशको राजस्व बाँडफाँड प्रतिशत

१९ जेठ, हेटौँडा । ३ नम्बर प्रदेशसभा बैठकमा शनिबार प्रदेश वित्तीय हस्तान्तरण व्यवस्थापन विधेयक प्रस्तुत भएको छ । ३ नम्बर प्रदेशसभा भवन हेटौँडामा बसेको बैठकमा आर्थिक मामिला तथा योजना मन्त्री कैलाश ढुंगेलले राजस्व बाँडफाँडसहितको विधेयक प्रस्तुत गरेका हुन् । 
मन्त्री ढुंगेलले प्रस्तुत गरेको विधेयकमा सवारी कर प्रदेशलाई ८० र स्थानीय तहलाई २० प्रतिशत, घरजग्गा रजिष्ट्रेशन शुल्क प्रदेशलाई ४० र स्थानीय तहलाई ६० प्रतिशत, विज्ञापन कर प्रदेशलाई ४० र स्थानीय तहलाई ६० प्रतिशत बाँडफाँड हुने उल्लेख छ । मनोरञ्जन कर प्रदेशलाई ४० र स्थानीय तहलाई ६० प्रतिशत, पर्यटन कर प्रदेशलाई ५० र स्थानीय तहलाई ५० प्रतिशत, ढुंगा, गिटि, बालुवा, चुनढुंगा, खरी ढुंगा, अभ्रख र दहत्तर बहत्तर कर प्रदेशलाई ५० र स्थानीय तहलाई ५० प्रतिशत बाँडफाँड हुने जनाईएको छ । करको दर भने आर्थिक ऐनमा तोकिने विधेयकमा उल्लेख गरिएको छ । 
विधेयकमाथिको सैद्धान्तिक छलफलमा भाग लिंदै प्रदेशसभा सदस्यहरुले विधेयक हतारमा आएको र समेट्नुपर्ने विषयहरु छुटेको भन्दै सुधार आवश्यक रहेको बताएका थिए । वित्तिय हस्तान्तरण भन्ने वित्तिकै अनुदान र राजस्वलाई मात्रै ध्यान दिएको भन्दै उनीहरुले ऋण र सहयोगबारे पनि विधेयकमा उल्लेख गर्नु जरुरी रहेको बताए । 
बैठकमा प्रदेशसभा सदस्य दीपक निरौला, प्रभात तामाङ, केशव पोखरेल, सरेश नेपाल र सन्तबहादुर प्रजाले विधेयकको सैद्धान्तिक पक्षबारे धारणा राखेका थिए । विधेयकबारेका जिज्ञासाहरुको जवाफ दिंदै मन्त्री ढुंगेलले प्रदेशसभा सदस्यहरुबाट आएका सुझावलाई आवश्यकता अनुसार समेटिने बताए । बैठक आइतबार विहान ११ बजेसम्मका लागि स्थगित भएको छ ।