नेपालको वाईल्ड रिपर्ज डान्स प्लसमा दोस्रो

१० असोज, हेटौँडा । भारतिय टेलिभिजन च्यानल स्टार प्लसमा संचालित डान्स प्लसको दोस्रो संस्करणमा नेपाली टोली वाईल्ड रिपर्ज क्रु दोस्रो भएको छ ।

आइतबार राति सम्पन्न अन्तिम प्रतिष्पर्धामा भारतका पियुष भगत र नेपालकै सुशान्त खत्रीलाई पछि पार्दै रिपर्ज दोस्रो भएको हो । रिपर्जले भारतिय रुपैँया १० लाख र यामाहाको स्कुटर प्राप्त गरेका छन् । रिपर्जले दर्शक र निर्णायकको मन जितेर लगातार ८ पटक डवल प्लस पाएर रेकर्ड तोडेको थियो । प्रतिष्पर्धामा पियुष तेस्रो र सुशान्त चौथो भए । 

तनय मल्हाराले उपाधी कव्जा

चार अन्तिम प्रतिष्पर्धीमध्ये भारतका तनय मल्हाराले उपाधी कव्जा गरेका छन् । महाराष्ट्र जलगाउँका १४ बर्षिय तनयले दर्शकको भोटको आधारमा उपाधी कव्जा गरेका हुन् । तनयले भारतिय रुपैंया २५ लाख रुपैँया, ट्रफि र हुण्डाई ग्राण्ड आईटेन कार प्राप्त गरेका छन् । रियो ओलम्पिकमा कास्य पदक जित्न सफल भारतिय ओलम्पियन साक्षि मल्लिकल चारवटै टोलीलाई सम्मान गरेकी थिईन् । अन्तिम चार प्रतिष्पर्धीले डान्स प्लसका मूख्य निर्णायक रेमो डिसुजाको ‘एविसीडि ३’ मा अभिनयको अवसर प्राप्त गरेका छन् ।

२ जुलाई २०१६ बाट लगातार २२ साता संचालन भएको प्रतिष्पर्धामा नेपालको वाईल्ड रिपर्ज क्रु र सुशान्त खत्रीलाई दर्शकले अन्तिम चारमा छनौट गरेका थिए । प्रतिष्पर्धा अवधिभर यी दुई टिमको प्रशिक्षक, मूख्य निर्णायक र अतिथिहरुले समेत प्रशंसा गरेका थिए ।