विकासका लागि भ्रष्टाचार विरुद्ध आक्रमणको नीति : प्रधानमन्त्री ओली

२१ जेठ, हेटौँडा । प्रधानमन्त्री केपी शर्मा ओलीले समृद्ध मुलुकका लागि भ्रष्टाचारविरुद्ध आक्रमणको नीति लिएको बताएका छन् ।  
प्रदेश ३ को प्रदेशसभा बैठकलाई सम्बोधन गर्दै प्रधानमन्त्री ओलीले समृद्धिका लागि सुशासन पहिलो शर्त रहेको भन्दै वर्तमान सरकारले गरिबि, भ्रष्टाचार र पछौटेपनको विरुद्ध आक्रमणको नीति लिएको बताए । उनले सबै खाले सिण्डिकेट अन्त्य गर्ने र यो कार्यक्रममा लाग्न प्रदेश सरकारलाई सुझाव दिए । अहिले जनताले चाहे अनुसार बहुमतको सरकार रहेको भन्दै विकास गर्ने अनुकुल वातावरण रहेको बताए ।  उनले विकासका खाका सुनाउँदै उनले तीन तहबीचको समन्वय आवश्यक रहेको बताए । 
उनले स्थानीय तह र प्रदेश सरकार छुट्टै सरकार नभई विकासका लागि संघीय सरकार अन्तरगतकै संरचना भएको बताए । उनले अबको समय विकासको समय भएकाले सबै खाले हिंसात्मक आन्दोलन ल्याग्न सुझाव दिए । छुट्टै मधेश जस्ता गतिविधिलाई आपराधिक गतिविधिको संज्ञा दिंदै प्रधानमन्त्री ओलीले यस्ता कार्य सरकारलाई स्विकार्य नहुने बताए । उनले शान्तिपूर्ण वार्तामार्फत समस्या समाधानका लागि आव्हान समेत गरे । प्रधानमन्त्री ओलीले उत्पादन र रोजगारीको अवसर सिर्जना गर्ने काममा सरकारले कार्य अघि बढाएको भन्दै आयात न्यूनिकरण गर्दै उत्पादनमुखी अर्थतन्त्रमा जोड दिनुपर्ने बताए । 
उनले कृषिको आधुनिकीरकरण, व्यवसायिकीकरणका लागि सरकार अघि बढेको भन्दै उद्योग स्थापनाका लागि नीति क्षेत्रसंग सहकार्य गर्ने समेत बताए । उनले आफु प्रधानमन्त्री भएपछि भारतसंगको समन्वयमा सुधार आएको बताउँदै छिमेकी र अन्तराष्ट्रिय क्षेत्रसंगको सुमधुर सम्बन्धबाट मात्रै विकास सम्भव रहेको बताए ।