हावा गफले देश चल्दैन : मन्त्री केसी

१० असोज, हेटौंडा । शहरी विकास मन्त्री अर्जुननरसिंह केसीले हावा गफले मात्रै देश नचल्ने भन्दै काम गरेर देखाउनु जरुरी रहेको बताएका छन् । नेपाली काँग्रेस थाहा नगर समितिले विजयादशमी, शुभदिपावली र छठको अवसरमा सोमबार गरेको शुभकामना आदानप्रदान एवं कार्यकर्ता भेटघाट कार्यक्रममा बोल्दै मन्त्री केसीले अघिल्लो सरकारले हावा गफ गरेर जनतालाई आश देखाए पनि काम गर्न नसकेको बताए ।

एमालेप्रति कटाक्ष गर्दै मन्त्री केसीले अरु पार्टी जस्तो हावा गफमा आशा देखाएर जनता अल्मल्याउने काम काँग्रेसले नगर्ने भन्दै जनताको दिर्घकालिन हित सोचेर काम गर्ने बताए । सरकार संविधानले तोकेको मितिमा तीनवटै निर्वाचन गराउन प्रतिवद्ध रहेको समेत उनले दावि गरे । सरकारको मूख्य ध्यान संविधान कार्यान्वयनमा रहेको भन्दै मन्त्री केसीले सबै दललाई विश्वस्त पार्दै तोकेको समयमै निर्वाचनसहितका कार्य पुरा गर्न तत्पर रहेको बताए ।

उनले सहमति, सहकार्य र सहअस्तित्वको अवधारणाका साथ अघि बढ्न प्रतिपक्षसहितका दललाई आग्रह गरे । संविधानमा देखिएका केही असहमतिका बुँदालाई संशोधन गरेर भएपनि असहमत पक्षलाई मूल धारमा ल्याई संविधानको पूर्ण कार्यान्वयनमा सरकारले काम गरिरहेको बताए । संविधानको कार्यान्वयन गर्नु प्रमुख दलको दायित्व रहेको भन्दै उनले कुनै पनि दलले बहानाबाजी गर्दै संविधान कार्यान्वयन गर्नबाट उम्कन नमिल्ने बताए । संविधानको पूर्ण कार्यान्वयनका लागि क्रियाशिल हुन आफ्ना कार्यकर्तालाई समेत निर्देशन दिए । व्यक्तिगत विचार भन्दा पार्टीको सिद्धान्तलाई आत्मसाथ गर्दै अघि बढ्नुपर्नेमा उनको जोड थियो । उनले काँग्रेस लोकतन्त्रका आधारभुत र विश्वव्यापी मान्यताबाट कहिल्यै पछि नहट्ने बताए । 
काँग्रेसका केन्द्रिय सदस्य बद्री पाण्डेले संविधान कार्यान्वयन गर्न नसकेकै कारण ओली नेतृत्वको सरकार ढलेको बताए । उनले संक्रमणकालको अन्त्यका लागि तोकेकै समयमा निर्वाचन सम्पन्न गर्नुपर्ने बताउँदै यसका लागि सबै दल एकमत हुनु आवश्यक रहेको बताए । कार्यक्रममा काँग्रेस नुवाकोट सभापति जगदिशनरसिंह केसी, मकवानपुर सभापति एवं सांसद इन्द्रबहादुर बानियाँ, निवर्तमान सभापति रघुरमण न्यौपाने लगायतले कार्यकर्ताहरुलाई स्थानीयस्तरमा पार्टीको जिम्मेवारी प्रतिवद्ध भएर निर्वाह गर्न सुझाव दिए ।

कार्यक्रममा नेपाली काँग्रेसका जिल्ला, क्षेत्र, नगर र गाउँ तहका नेता कार्यकर्ताको सहभागिता रहेको थियो । नेपाली काँग्रेस थाहा नगर समिति सभापति योगेन्द्रमान श्रेष्ठको अध्यक्षतामा कार्यक्रम भएको थियो ।
तस्विर : शिव देवकोटा