सिंगापुरमा ट्रम्प र उनबीच भेटवार्ता सकियो

२९ जेठ, हेटौँडा । अमेरिकी राष्ट्रपति डोनाल्ड ट्रम्प र उत्तर कोरियाली सर्वोच्च नेता किम जोङ उनबीच सिंगापुरमा भएको भेटवार्ता सकिएको छ । उनीहरुबीच करिब ५० मिनेट भेटवार्ता भएको थियो । त्यसपछि दुवै देशका प्रतिनिधिबीच छलफल भएको छ । 

दुई नेताबीच मात्रै भएको भेटमा एक आपसमा सम्बन्ध बिस्तार हुने विश्वास लिएका छन् । ट्रम्प र उनले हात मिलाएर छलफलको सुरुवात गरेका थिए । छलफल सान्टोसा द्वीपको क्यापला होटलको लाईब्रेरीमा भएको हो । पत्रकारहरूलाई डोनाल्ड ट्रम्पले छलफल राम्रो भएको बताएका छन् । छलफलको सुरुवातमा राम्रोसँग कुरा हुने र विश्व शान्ति एवं सम्बन्ध विस्तारमा यो भेट सहयोगी बन्नेमा आशंका व्यक्त गरेका ट्रम्पले राम्रो भएको प्रतिक्रिया दिएका छन् । उनले आफुलाई राम्रो महसुस भईरहेको बताउँदै यसले राम्रो सम्बन्ध विस्तार हुनेमा विश्वस्त रहेको बताए । तर भेटको मूख्य विषयबस्तु भने बाहिर ल्याईएको छैन ।

अमेरिकाको तर्फबाट राष्ट्रपति ट्रम्प विदेशमन्त्री माइक पोम्पेयो, व्हाइट हाउसका चिफ अफ स्टाफ जोन केली र सुरक्षा सल्लाहकार जोन बाल्टन रहेका छन् । उत्तर कोरियाको तर्फबाट किम जोङ उन र उनका सबैभन्दा निकट पूर्व विदेशमन्त्री री सु योङको सहभागिता रहेको छ ।