आर्थिक मन्त्री ढिलो पुगेपछि प्रदेशसभामा खैलाबैला

File Photo

३० जेठ, हेटौँडा । प्रदेश ३ को प्रदेशसभा बैठकमा मन्त्री नै ढिलो पुगेपछि केहीबेर खैलाबैला भएको छ । विधेयक प्रस्तुत गर्नुपर्ने आर्थिक मामिला तथा योजनामन्त्री कैलाश ढुंगेल नै ढिलो भएपछि सभामुख र प्रदेशसभा सदस्यहरु नै अन्यौलमा परी मुखामुख गर्न थालेका थिए । 
‘कर तथा गैरकर राजस्व लगाउने र उठाउने सम्बन्धी विधेयक’ सैद्धान्तिक छलफलका लागि प्रदेशसभा बैठकमा प्रस्तुत गनुपर्ने ढुंगेल ३ मिनेट ढिलो प्रदेशसभा बैठकमा पुगेका थिए । दिउँसो २ः३० बजेका लागि बोलाईएको बैठक दिउँसो २ः३२ बजे शुरु पनि ढुंगेल भने उपस्थित थिएनन् । बैठक शुरु हुने वित्तिकै सभामुख सानुकुमार श्रेष्ठले विधेयक सैद्धान्तिक छलफलका लागि प्रस्तुत गर्न ढुंगेललाई आग्रह गरे । तर मन्त्री ढुंगेल भने बाहिर क्यान्टिनमा थिए । त्यसपछि सभामुख र प्रदेशसभा सदस्य अन्यौलमा परेर मुखामुख गर्न थाले । लगतै प्रदेशसभा सचिवालयको सुझावपछि उनले ‘आर्थिक मामिला तथा योजनामन्त्री कैलाश ढुंगेलको सट्टामा’ भनेका मात्रै थिए, २ः३५ मा हतारहतार ढुंगेल प्रदेशसभा बैठकभित्र प्रवेश गरे र विधेयक सैद्धान्तिक छलफलका लागि प्रस्तुत गरे । 
विधेयक प्रस्तुत गर्नुपर्ने मन्त्री बाहिर बसेको भन्दै कुरा चलेपछि उनका सहयोगीहरुले भने प्रदेशसभाको घण्टी नसुनिएकाले यस्तो भएको भन्दै प्रष्टिकरण दिएका थिए ।