३ नम्बर प्रदेशमा कृषि कर लगाउन लागेकोमा विरोध

प्रतिवेदन प्रस्तुत गर्दै अर्थ तथा विकास समितिका सभापति सरेश नेपाल

३० जेठ, हेटौँडा । प्रदेश नम्बर ३ मा कृषि आयमा कर लगाउन लागेको भन्दै प्रदेशसभा सदस्यहरुले विरोध गरेका छन् । 
प्रदेशसभा बैठकमा बुधबार आर्थिक मामिला तथा योजना मन्त्री कैलाश ढुंगेलले प्रस्तुत गरेको ‘कर तथा गैरकर राजस्व लगाउने र उठाउने सम्बन्धी विधेयक’मा कृषि आयमा कर लगाउने भनिएकोमा उनीहरुले यसको विरोध गरेका हुन् । प्रदेशसभा सदस्य प्रभात तामाङले कृषि आयमा कर लगाउन नहुने भन्दै यसले मूल्य बृद्धि गर्ने बताए । उनले कृषिमा कर लगाउँदा गरिब, किसानमाथि अन्याय हुने भन्दै यसबारे प्रदेश सरकारको ध्यानाकर्षण गराए । प्रदेशसभा सदस्य रिना गुरुङले कृषिमा कर लगाउनु बेठिक भएको भन्दै यसलाई हटाउन माग गरिन् । उनले अहिलेसम्म कृषि क्षेत्रमा दिएको सुविधा नै अपुग भईरहेको अवस्थामा कर लगाउनु अनुपयुक्त हुने बताईन् । 
प्रदेशसभा सदस्य सिता अधिकारीले कृषिमा कर लगाउने नभई विउविजन, कृषि औजारमा छुट दिनुपर्नेतर्फ प्रदेश सरकारको ध्यानाकर्षण गराईन् । प्रदेशसभा सदस्यहरुको प्रश्नको जवाफ दिंदै आर्थिक मामिला तथा योजनामन्त्री ढुंगेलले नयाँ विषय भएकाले कृषि करबारे धेरै चर्चा हुनुलाई स्वभाविक भएको बताए । उनले कृषकले कृषि उत्पादन विक्रि गर्दा वा व्यापारीले विक्रि गर्दा कर लगाउने यसबारे प्रदेश सरकार स्पष्ट हुनुपर्ने बताएका थिए । 
प्रदेशसभामा पेश भएको विधेयकमा ‘कृषि आयमा कर लगाउन सकिनेछ’ भनिएको छ । यसको स्पष्टिकरणमा ‘कृषि आय भन्नाले धान, गहुँ, कोदो, फापर, मकै, फलफुल, तरकारी, आलु, मासुजन्य पर्दाथ, माछा, दुध, तेल्हन जस्ता अन्य खाद्य बस्तुको उत्पादनको विक्रिबाट हुने आयलाई सम्झनु पर्दछ’ भनिएको छ । 
यसअघि, बैठकमा दुई प्रतिवेदन प्रस्तुत भएका थिए । बैठकमा अर्थ तथा विकास समितिका सभापति सरेश नेपालले प्रदेश आकस्मिक कोष विधेयक र वित्तीय हस्तान्तरण सम्बन्धि विधेयक प्रतिवेदनसहित पेश गरेका हुन् । विधेयक एक साता अघि दफावार छलफलका समितिमा पठाईएको थियो । छलफल पछि सभापति नेपालले प्रदेश सभा बैठकमा प्रतिवेदनसहित पेश गरेका थिए ।