कांग्रेस जिल्ला सभापतिको तयारीबारे छलफल

तस्विर : ईन्दबहादुर बानियाँको फेसबुक पेजबाट

२ असार, हेटौँडा । हेटौँडामा असार ५, ६ र ७ गते हुन लागेको कांग्रेस जिल्ला सभापतिहरुको राष्ट्रिय भेलाको तयारीका लागि शनिबार हेटौँडामा छलफल भएको छ । पार्टी जिल्ला सभापति ईन्द्रबहादुर बानियाँको अध्यक्षतामा बसेको जिल्ला विस्तारित बैठकमा राष्ट्रिय भेला तयारीबारे छलफल भएको हो । 
कार्यक्रममा जिल्ला सभापतिहरुको भेलाका लागि गठन भएका विभिन्न समितिले अहिलेसम्म गरेका कामबारे छलफल गर्दै अब गर्नपर्ने योजनाबारे रणनीति तयार गरिएको थियो । जिल्ला भेला उद्घाटन कार्यक्रममा पार्टी सभापति शेरबहादुर देउवा, बरिष्ठ नेता रामचन्द्र पौडेल, र भेला संयोजक जिल्ला मकवानपुरका सभापति एवं प्रदेश ३ कांग्रेस संसदीय दलका नेता ईन्द्रबहादुर बानियाँले सम्बोधन गर्ने कार्यक्रम तय भएको जानकारी दिईएको थियो । 
भेला उद्घाटनको दिन कार्यक्रम स्थल पल्पसा सभाहल परिसरमा बृहत रक्तदान कार्यक्रम गरिने स्वास्थ्य समिति संयोजक राजिव सुवेदीले बताए । बैठकमा पार्टी विधानमा गर्नुपर्ने संशोधन वा परिमार्जन, संगठन सुदृढिकरण रणनीति, स्थानीय, प्रदेश र संघीय तहमा पार्टीको भूमिका, प्रतिपक्षको रुपमा पार्टीको भुमिका, समसामयिक राजनैतिक अवस्था लगायतका विषयमा समूहगत छलफल गरिएको छ । 
छलफलको निचोडलाई सभापतिहरुको राष्ट्रिय भेलामा पार्टी जिल्ला सभापति बानियाँले प्रस्तुत गर्ने प्रवक्ता प्रदिप कोइरालाले बताए ।