सरकारबाट उपेक्षामा परेको यौनिक तथा लैंगिक अल्पसंख्यकको गुनासो

१२ असार, हेटौँडा । संघीयदेखि प्रदेश सरकारबाट आफुहरु उपेक्षामा परेको यौनिक तथा लैंगिक अल्पसंख्यकहरुले गुनासो गरेका छन् । 
निल हिरा समाज काठमाण्डौंले मंगलबार हेटौँडामा गरेको संचारकर्मीसंगको अन्तरक्रियामा यौनिक तथा लैंगिक अल्पसंख्यक समुदायका प्रतिनिधिहरुले आफुहरुलाई सबै तहका सरकारले उपेक्षा गरेको गुनासो गरेका हुन् । 
संघीयताले पछि परेका र अल्पसंख्यक समुदायको हितमा काम गर्ने अपेक्षा गरिएपनि अहिले प्रस्तुत भएका संघीयदेखि स्थानीय तहसम्मको नीति तथा कार्यक्रम र बजेटले यो समुदायलाई उपेक्षा गरेको उनीहरुको भनाई छ । निल हिरा समाजका उपनिर्देशक परशुराम राईले आफुहरु अधिकारको लडाईमा लागेको डेढ दशक नाघिसकेको बताउँदै संघीयतामा पनि आफुहरुको मुद्धालाई सम्बोधन गर्न राज्य तहले उदासिनता देखाएको आरोप लगाए । राज्यले विभिन्न अन्तराष्ट्रिय महासन्धीमा हस्ताक्षर गर्नुका साथै संविधानमा पनि यो समुदायको अधिकारबारे स्पष्ट उल्लेख गरेपनि संघीयदेखि स्थानीय तहसम्मले यसलाई कार्यान्वयनका लागि नीति तथा कार्यक्रम अघि नसारेको बताए । 
कार्यक्रममा बोल्दै निल हिरा समाजका परियोजना अधिकृत विश्वराज अधिकारीले नेपालमा ९ लाखको हाराहारीमा यौनिक तथा लैंगिक अल्पसंख्यकहरुको जनसंख्या रहेको बताउँदै उनीहरु पहिचानको आधारमा सरकारी कार्यालयमा रोजगारी पाउनबाट बन्चित रहेको बताए । कार्यक्रममा फ्रेन्ड्स हेटौँडाका सुरज थापा, बर्षा मगर लगायतले आफुहरु राज्य, समाज र परिवार दुबैको उपेक्षामा परेको भन्दै आफुहरु ठूलो समस्यामा रहेको बताए । 
आफुहरुको अधिकार प्राप्तिको लडाईमा संचारमाध्यमको सकारात्मक भूमिका रहेको भन्दै यसको निरन्तरताको अपेक्षा समेत उनीहरुको थियो । कार्यक्रममा नेपाल पत्रकार महासंघ ३ नम्बर प्रदेश अध्यक्ष प्रताप विष्ट, महासंघ मकवानपुरका सचिव गणेशदर्पण अधिकारी, संचारकर्मी इन्दिरा न्यौपाने, निल हिरा समाजका संचार अधिकृत माधव दुलाल लगायतले यौनिक तथा लैंगिक अल्पसंख्यक समुदाय अधिकार प्राप्तिका क्रममा रहेको भन्दै उनीहरुको आवाजलाई राज्यतहसम्म पु¥याउन संचारमाध्यमले सकारात्मक भूमिका निर्वाह गर्ने बताएका थिए ।