फेयर प्लेका आधारमा जापान विश्वकपको नकाउट चरणमा प्रवेश

१४ असार, हेटौँडा । एशियाली मुलुक जापान विश्वकपको समूह चरण पार गर्दै नकआउट चरणमा प्रवेश गरेको छ ।
जापान विश्वकपको समूह एचबाट उपविजेताका रुपमा नकआउट चरणमा प्रवेश गरेका हो । यसै समूहको कोलम्बिया भने समूह विजेताको रुपमा नकआउट चरणमा प्रवेश गरेको छ ।  
समूहको दुई खेल सकिँदा ४ अंकसहित शीर्ष स्थानमा रहेको जापान आज पोल्याण्डसँग १–० गोलले पराजित भयो । पोल्याण्डसँग पराजित भए पनि जापानले समान ४ अंक रहेको सेनेगललाई पछि पार्दै नकआउट चरणमा पुगेको हो । सेनेगल र जापानको समान ४ अंक र गोल अन्तर पनि बराबर भएपछि फेयर प्लेका आधारमा जापान भाग्यमानी बनेको हो ।
विहिबारनै भएको अर्को खेलमा कोलम्बिया सेनेगललाई पराजित गर्दै ६ अंकसहित समूह विजेताका रुपमा छनोट भएको हो ।
विश्वकपको इतिहासमै कुनै टिम फेयर प्लेका आधारमा अघिल्लो चरण पुगेको यो पहिलो पटक हो । समूह चरणको खेलमा जापानले सेनेगलले भन्दा दुई वटा कम पहेँलो कार्ड बेहोरेकाले उ अर्काे चरणमा पुग्न सफल भएको हो । सेनेगलले  तीन खेलमा गरी ६ वटा पहेँलो कार्ड पाएको थियो भने जापानले ४ वटा पहेँलो कार्ड पाएको थियो ।  
विहिबार रुसको भोग्लोग्राड एरिनामा सम्पन्न समूह चरणको अन्तिम खेलको पहिलो हाफ बराबरीमा सकिए पनि दोस्रो हाफमा पोल्याण्डका लागी खेलको ५९औं मिनेटमा जन बेडनारिकले गरेको गोल नै पोल्याण्डको सान्त्वना जितमा निर्णायक बन्यो । यसअघि नै विश्वकपबाट बाहिरिइसकेको पोल्याण्डले एक जितसँग विश्वकपको सुखद अन्त्य गरेको छ ।
यता कोलम्बियाले पनि सेनेगललाई १–० ले नै हराउँन सफल भयो । पहिलो हाफ उसले पनि बराबरी खेलेको थियो । तर, दोस्रो हाफमा सेनेगलका लागी यारी मिनाले गोल गरे । यारीको गोलले कोलम्बिया समूह विजेता बन्दै नकआउट चरणमा पुग्न समेत सफल भयो ।
प्रिक्वार्टरफाइनलमा कोलम्बियाले समूह जीको विजेता र जापानले उपविजेतासँग प्रतिस्पर्धा गर्नेछन् । समूह जीको विजेताको छिनोफानोका लागी राति पौने १२ बजे इंग्ल्याण्ड र बेल्जियम भिड्दैछन् ।
(एजेन्सी)