प्रतिपक्षको अवमूल्यन गरे सदन अवरुद्ध गर्ने चेतावनी

१७ जेठ, हेटौँडा । नेपाली कांग्रेसले प्रदेश नम्बर ३ सरकारले प्रतिपक्षको अवमूल्यन गरे सद अवरुद्ध गर्ने चेतावनी दिएको छ । प्रदेशसभा बैठकमा बोल्दै विपक्षी दलका नेता ईन्द्रबहादुर बानियाँले यस्तो चेतावनी दिएका हुन् । 
छलफलमा भाग लिंदै प्रमुख प्रतिपक्ष दल नेपाली कांग्रेसका संसदीय दलका नेता ईन्द्रबहादुर बानियाँले सपना ठूलो बाँड्ने प्रदेश सरकारले बजेट विनियोजन गर्दा भने थोरै बाँडफाँड गरेको बताए । उनले स्थानीय तहले जस्तो २–४ लाख रुपैँयाको बजेटसमेत प्रदेश सरकारले विनियोजन गरेको भन्दै आलोचना गरे । उनले प्रदेश गौरवका योजना भनेर नामाकरण गरेपनि बजेट भने नछुट्याएकोप्रति आपत्ति जनाए । पानीको मुहान संरक्षणका लागि भन्दै १५ लाख मात्रै विनियोजन गरेर सरकारले हाँस्यास्पद काम गरेको बताए । उनले भोजभतेर, तालिम, सेमिनार, गोष्ठीमा बजेट छुट्टयाएर अनियमिता गर्न खोजेको भन्दै यसबाट प्रदेश समृद्धि नहुने बताए । उनले मन्त्रीमुखी, नारामुखी र एकांकी खालको बजेट आएको आरोप लगाए । बजेटप्रति आफुहरुको पूर्ण असहमति रहेको भन्दै नसच्चिए सदन अवरुद्ध समेत गर्ने चेतावनी दिए ।
बैठकमा बोल्दै सत्तापक्षीय प्रदेशसभा सदस्य सिता अधिकारीले बजेटबारे बोल्दा सन्तुलन कायम गर्नुपर्नेबारे आफु जानकार रहेको भन्दै तर बजेटप्रति सन्तुष्ट नरहेको बताईन् । उनले योजना मागेर मन्त्रीहरुले आफुहरुलाई झुक्याएको गुनासो गरिन् । राप्रपाकी प्रदेशसभा सदस्य रिता माझीले नेताहरुको नाममा शालिक, पार्क, उद्यानमा ठूलो बजेट खर्च गरिएकोप्रति कटाक्ष गर्दै शालिक जोगाउन समेत बजेट विनियोजन गर्न सुझाव दिईन् । उनले शव्दले मात्रै समृद्धि नआउने भन्दै समानुपातिक बजेट वितरणमा सरकार चुकेको बताईन् ।
बैठकमा विपक्षी नेपाली कांग्रेसका प्रदेशसभा सदस्य विजया केसी श्रेष्ठ, न्हुच्छेनारायण श्रेष्ठ, पुकार महर्जन लगायतले बदनियतपूर्ण ढंगले मन्त्रीमुखी बजेट ल्याईएको भनदै विरोध गरे । उनीहरुले विस्तृत अध्ययन प्रतिवेदन (डिपिआर) तयार भईसकेका योजनामा पुन डिपिआरका लागि बजेट विनियोजन भएकोप्रति आपत्ति जनाए ।
बैठकमा सत्तापक्षीय प्रदेशसभा सदस्यहरु प्रदिपकुमार कटुवाल क्षेत्री केसी, रामकाजी श्रेष्ठ, सिता लामा, शशीजंग थापा लगायतले प्रदेशस्तरीय यातायात व्यवस्था कार्यालय आवश्यक रहेको, बजेट समृद्धिको लक्षतर्फ उन्मुख भएको र सन्तुलित ढंगले आएको बताएका थिए । विनियोजन विधेयकमाथिको छलफल सकिएको छ ।