सरकारका विरुद्ध कांग्रेस प्रतिरोधमा उत्रिने

२० असार, काठमाडौं । प्रमुख प्रतिपक्षी दल नेपाली कांग्रेसले सरकारले लोकतन्त्र र गणतन्त्रको उपहास गरेको ठहर गरेको छ ।

नेपाली कांग्रेस संसदीय दलको बुधबार बसेको बैठकले सरकारले सर्वसाधरणलाई भेला हुने र अभिव्यक्ति स्वतन्त्रता प्रयोग गर्ने अधिकारलाई कुण्ठित गराउन खोजेको ठहर कांग्रेसले गरेको हो । सरकारले पछिल्लो समयमा जारी गरेको विभिनन क्षेत्रमा जारी गरेको निषेधाज्ञा फिर्ता नलिए तोड्ने चेतावनी पनि दिएको छ । सरकारले पेट्रोलियम पदार्थको मूल्यवृद्धि गरेको, उपभोग्य वस्तुमा २० प्रतिशत मूल्यवृद्धि गरेको भन्दै प्रतिरोध गर्ने कांग्रेसले निर्णय गरेको छ । बैठकले अनशनरत् डाक्टर गोविन्द केसी र गंगामाया अधिकारीका मागमा ऐक्यबद्धता जनाएको छ । डा. गोविन्द केसीका मागप्रति ऐक्यबद्धता जनाउन र उनको स्वास्थ्य अवस्था बुझ्न तीनजना सांसदलाई जुम्ला पठाउने निर्णय गरेको प्रमुख सचेतक बालकृष्ण खाँडले बताए ।

त्यसैगरी, गंगामाया अधिकारीका मागप्रति ऐक्यबद्धता जनाउन र स्वास्थ्य अवस्था बुझ्नसमेत तीनजना सांसदको टोली वीर अस्पताल पठाउने निर्णय पनि गरेको छ । बैठकले संसदीय समितिका सभापति तथा सभामुख र उपसभामुखजस्ता महत्वपूर्ण पदमा सरकारले एकलौटी गरेको कांग्रेसको निष्कर्ष छ ।