संचारमाध्यमको कर खारेज गर्न उपमहानगरसंग माग

२७ असार, हेटौँडा । हेटौँडा नगर क्षेत्रमा रहेका संचारमाध्यमहरुलाई व्यवसाय कर लगाउने हेटौँडा उपमहानगरपालिकाको प्रस्तावप्रति संचारमाध्यमका प्रतिनिधिहरुले विरोध गरेका छन् ।

उपमहानगरपालिकाले आगामी आर्थिक बर्ष ०७५/०७६ मा संचारमाध्यमलाई करको दायरामा ल्याउने प्रस्ताव गरेको थियो । यसको विरोधमा संचारमाध्यमका प्रतिनिधिले प्रमुख हरिबहादुर महतलाई ज्ञापनपत्र बुझाएका हुन् । ज्ञापनपत्रमा संचारमाध्यम राज्यले तोकेको निकायमा दर्ता भई सम्बन्धित निकायमा कर समेत तिरेर संचालनमा रहेको अवस्थामा पुनः उपमहानगरपालिकाले समेत करको दायरामा ल्याउन खोजेको प्रति आपत्ति जनाएको छ । ज्ञापनपत्रमा उपमहानगरपालिकाले प्र्रस्ताव गरेको व्यवसाय कर खारेजीको माग गरिएको छ ।

उपमहानगरपालिकाले संचारमाध्यमहरुलाई आफ्नो नियन्त्रणमा लिई अंकुश लगाउने काम गर्न लागेकोमा यसको विरोध गरिएको रेडियो मकवानपुरका स्टेशन प्रमुख राममणी दाहालले जनाए । ज्ञापनपत्र बुझ्दै प्रमुख हरिबहादुर महतले विगतमा पनि यो करबारे उल्लेख भएपनि कसैसंग कर नलिएको बताउँदै यसलाई छुट दिन सकिने बताए ।

ज्ञापनपत्र बुझाउन हेटौँडाका पत्रिका, रेडियो, अनलाईन, टेलिभिजन र अनलाईन टेलिभिजनका संचालक एवं प्र्रतिनिधिहरु उपमहानगरपालिका कार्यालय पुगेका थिए ।