काँग्रेस सम्पर्क समितिको अधिवेशन असोज १५ मा

११ असोज, हेटौँडा । नेपाली काँग्रेस मकवानपुर–काठमाण्डौं सम्पर्क समितिको केन्द्रिय अधिवेशन असोज १५ गते हुने भएको छ । समितिको दोस्रो केन्द्रिय अधिवेशन असोज १५ गते काठमाण्डौंमा हुने भएको हो । 
अधिवेशनको तयारी तिब्र पारिएको समितिका सचिव पुरुषोतम ठकुरीले बताए । ठकुरीका अनुसार अधिवेशन उद्घाटनको अवसरमा सम्पर्कका लागि महत्वपूर्ण मानिने टेलिफोन डायरी समेत विमोचन हुनेछ । टेलिफोन डायरीमा नेपाली काँग्रेस केन्द्रिय कार्यसमिति, मकवानपुर जिल्ला कार्यसमिति, क्षेत्रीय कार्यसमिति, नगर कार्यसमिति, गाउँ कार्यसमितिमा रहनु भएका महानुभावको नाम र नम्बरका साथै नेपाली काँग्रेसबारे आधारभुत जानकारी रहने छ ।
अधिवेशनलाई लक्षित गरेर असोज १४ गतेसम्म नयाँ सदस्यता समेत वितरण भईरहेको समितिले जनाएको छ । नयाँ नेतृत्वसमेत चयन गर्ने अधिवेशनमा सहभागितालाई व्यवस्थित गर्न मकवानपुरको ४ वटै निर्वाचन क्षेत्रका लागि संयोजक तोकिएको छ । मकवानपुर क्षेत्र नम्बर १ मा संगम बानियाँ, २ मा देव श्रेष्ठ, ३ मा केशवप्रसाद मैनाली र क्षेत्र नम्बर ४ मा कपिल अर्याल र अजय चेपाङसँग समन्वय गरी सदस्यता लिन र कार्यक्रममा सहभागिता जनाउन सकिने सचिव ठकुरीले बताए ।