अब हेटौडाका बजार क्षेत्र  पुर्ण रुपमा नो पार्किङ

फाईल फोटो

१८ साउन, हेटौँडा । अब हेटौँडा उपमहानगरपालिका भित्र पर्ने  पूर्व पश्चिम राजमार्ग र त्रिभुवन राजपथसंग सडक जोडीएको बजार क्षेत्रमा पूर्ण रुपमा पार्किङ निषेध गरिने भएको छ ।  

हेटौँडा उपमहानगरपालिकाका मेयर हरिबहादुर महतको अध्यक्षतामा प्रजिअ, प्रहरी प्रमुख सहितको स्थानीय प्रशासन सम्मिलित आजको बैठकले पूर्व पश्चिम राजमार्ग अन्तर्गतको राप्तिपुलदेखि बुद्धचोक र वन विज्ञान अध्ययन संस्थानसम्म तथा त्रिभुवन राजपथको चौकिटोल ओरालोदेखि बुद्धचोकसम्म साना–ठूला सवारी साधन पार्किङलाई  पूर्ण रुपमा बन्द गर्ने   निर्णय भएको  हो ।
 राप्तिपुलदेखि बुद्धचोक क्षेत्रमा नो पार्किङ गर्ने सम्बन्धमा राप्तिरोडमा अवस्थित रक्त सञ्चार केन्द्रको दक्षिणपट्टिको खाली ठाउँ र  बुद्धचोकको दक्षिणमा अवस्थित भिमसेन मिनि मार्केट क्षेत्रमा पार्किङ क्षेत्र तोकिने निर्णय भएको छ  भने राप्तिरोडको  दक्षिणतर्फ गरिएको दुई पाङ्ग्रे सवारी साधनको  पार्किङलाई हटाईने भएको छ ।  
 त्यसैगरी हेटौँडा १को  चौकीटोल ओरालोदेखि  हेडम्बी चोक हुदै बुद्धचोकसम्मको   त्रिभुवन राजपथको दाया बाया  नो पार्किङ घोषणा गरिने भएको हो । चौकीटोल ओरालोदेखि  हेडम्बी चोक हुदै बुद्धचोकसम्मको पार्किङको हकमा  पुरानो देवि सिनेमा हल रोड र पिपलबोटको भित्री रोडमा पार्किङ स्थल कायम गरिने भएको छ । 

 त्यस्तै त्रिभुवन राजपथ अन्र्तगत पर्ने बुद्धचोकदेखि फरेष्ट्रिसम्म पनि  नो पार्किङ क्षेत्र हुने भएको छ । यस क्षेत्रमा हुदै आएको पार्किङलाई  टिसिएनको खाली जग्गामा  लगिने भएको छ ।  साथै नो पार्किङ क्षेत्रमा चार पाङ्ग्रे सवारी साधन लोड अनालेड गर्ने व्यवस्था मिलाउनका लागि बिहान साढे ८ बजे अगाडि र साँझ साढे ७ बजेपछि मात्र लोड अनलोड गर्न पाईने निर्णय भएको छ ।  त्यस्तै हेटौाडा ४  स्कूलरोडमा कायम रहेको  पार्किङलाई  भुटनदेवी स्कल अगाडि कायम गरिने भएको छ  । त्यसैगरी बैठकमा  कान्ति लोकपथ क्षेत्रमा नो पार्किङ गर्नका लागि यथासिघ्र विकल्प खोजी  गर्ने निर्णय भएको छ ।