तरुण नगर अध्यक्ष गिरीसहित ३ जना रिहा

२१ साउन, हेटौँडा । हेटौँडा–१७ गैरीगाउँमा मोटरसाइकललाई ठक्कर दिने टिपर ल्याउनेका क्रममा नियन्त्रणमा लिएका नेपाल तरुण दलका नगर अध्यक्षसहित ३ जना रिहा भएका छन् । तरुण दल नगर अध्यक्ष सुनिल गिरीसहित ३ जनालाई प्रहरी सोमबार बेलुकी छोडेको हो ।

घटनामा संलग्न भएको भन्दै प्रहरीले नेपाल तरुण दल हेटौँडा नगर अध्यक्ष सुनिल गिरी, स्थानीय हरिशरण थापा र रणबहादुर श्रेष्ठलाई पक्राउ गरेको थिए । साँझ नेपाली कांग्रेस मकवानपुरका निवर्तमान सभापति रघुरमण न्यौपाने, नगर सभापति आनन्दराम पराजुली, तरुण जिल्ला अध्यक्ष ईश्वर पाठक, सचिव सचित थापा लगायतसहित जिल्ला प्रहरी कार्यालयमा भएको छलफलमा सहमति जुटेपछि उनीहरुलाई रिहा गरेको तरुण दल जिल्ला सचिव थापाले बताए । पीडितलाई उचित राहत उपलव्ध गराउन पहलका लागि प्रहरीसंग छलफल भएको थियो ।

पीडित पक्षको मागबारे सम्बोधनका लागि पहल गर्ने प्रहरीले प्रतिवद्धता व्यक्त गरेको जनाईएको छ । सोमबार दिउसो टिपर प्रहरीले हेटौँडा लैजान खोजेपछि स्थानीय र प्रहरीबीच झडप भएको थियो । झडपपछि गैरीगाउँदेखि कृष्णनगरसम्मको क्षेत्र तनावग्रस्त बनेको थियो । आक्रोशित स्थानीयले प्रहरीमाथि ढुंगा प्रहार गरेका थिए भने प्रहरीले ७ सेल अश्रु ग्याँस प्रहार गरेको थियो ।