चोरी भएका मोटरसाइकल सम्बन्धित धनीलाई हस्तान्तरण

२२ साउन, हेटौँडा । प्रदेश नम्बर ३ प्रहरी कार्यालय हेटौंडाले चोरी भएका ३ वटा मोटरसाइकल सम्बन्धित धनीलाई हस्तान्तरण गरेको छ । कार्यालयको क्षेत्रीय अनुसन्धान टोलीबाट असार २५ गते बरामद गरेको सवारी साधनमध्ये ३ वटा मोटसाइकल सम्बन्धित धनीलाई बुझाएको हो । 
कार्यालयका निमित्त कार्यालय प्रमुख प्रहरी उपरीक्षक दिपेन्द्र जिसिले बरामद भएका मोटरसाइकल धनीलाई हस्तान्तरण गरेका हुन् । काठमाण्डौंको पेप्सीकोलाबाट हराएको कालो रंगको १५० सिसिको पल्सर, काठमाण्डौंकै ठमेलबाट हराएको २०० सिसिको कालो रातो रंगको एनएस पल्सर तथा पोखराबाट हराएको कालो रातो रंगको २०० सिसिको पल्सर हस्तान्तरण गरेको छ । ति मोटरसाइकल चितवन भरतपुरको विभिन्न अस्पतालको कम्पाउण्डमा वास्तविक नम्बर परिवर्तन गरी वेवारीसे अवस्थामा पार्किङ गरीराखेको अवस्थामा बरामद गरेको थियो । 
कार्यालयका क्षेत्रीय अनुसन्धान समुहका प्रहरी निरीक्षक रोशन थापाको कमाण्डमा खटिएको प्रहरी टोलीले ६ वटा बिभिन्न कम्पनीका मोटरसाइकल र एक बोलेरो गाडी बरामद गरेको छ । हस्तान्तरण गरेका बाहेक अन्य मोटरसाइकलको वास्तविक धनी नखुलेको बताउँदै यसको पहिचान गरी हस्तान्तरण गर्ने र चोरी गर्ने समूहको खोजि कार्य भईरहेको प्रदेश नम्बर ३ प्रहरी कार्यालय हेटौंडाले जनाएको छ ।