नो पार्किङको विरोधमा प्रजिअ र मेयरलाई ध्यानाकर्षणपत्र

  २४ साउन, हेटौडा । अहिलेको नो पार्किङ अवधारणा अव्यवहारिक  र  व्यवसायीहरुको हितमा  नभएको भन्दै मकवानपुर उद्योग वाणिज्य संघको अगुवाईमा नो पार्किङको बिरोध गर्दै प्रमुख जिल्ला अधिकारी र हेटौंडा उपमहानगरपालिको प्रमुखलाई ध्यानाकर्षण पत्र बुझाइएको छ ।

ध्यानाकर्षणपत्र बुझदै प्रमुख जिल्ला अधिकारी आसमान तामाङले पार्किङ व्यवस्थापनका बिषयमा सरोकारवाला पक्षसँग छलफल गरीने  प्रतिबद्धता व्यक्त गरेका छन्  । त्यसैगरी हेटौँडा उपमहानगरपालिकाका प्रमुख हरिबहादुर महतले व्यवसायीका मागबारे कार्यपालिकामा छलफल गरि निर्णय गर्ने बताएका छन ।

त्यसैगरी राप्तिरोडमा गरेको ‘नो पार्किङ’ को विरोधमा विहिबार हेटौँडा बजार बन्द गरिएको थियो । मकवानपुर उद्योग बाणिज्य संघको नेतृत्वमा बजार बन्द गरिएको हो । उनीहरुले मकवानपुर उद्योग बाणिज्य संघबाट ¥यालीसहित बजार परिक्रमा गर्दे हेटौंडा उपमहानगरपालिकामा धर्ना दिएका थिए । मकवानपुर उद्योग बाणिज्य संघ, हेटौँडा उपमहानगरपालिका र प्रहरीबीच भएको छलफलमा नो पार्किङबारे सहमति जुटेको भनेपनि राप्तिरोडका व्यापारीले असन्तुष्टि व्यक्त गरेका छन् । उनीहरुले बजारका सबै क्षेत्रमा नो पार्किङ गर्नुपर्ने नभए राप्तिरोडमा पनि पार्किङ गर्न पाउनुपर्ने माग राखेका छन् । ट्राफिक प्रहरीले अहिले वन विज्ञान अध्ययन संस्थानदेखि चौकीटोल र बुद्धचोकदेखि राप्तिरोडसम्म नो पार्किङ क्षेत्र घोषणा गरेको छ ।