युवा दक्षता अभिबृद्धिमा लगानी गरेमात्रै देश समृद्ध : मन्त्री दुलाल

२७ साउन, हेटौँडा । प्रदेश नम्बर ३ का सामाजिक विकास मन्त्री युवराज दुलालले युवाहरुको दक्षता अभिबृद्धिमा राज्यले लगानी गर्नुपर्ने बताएका छन् ।
अन्तराष्ट्रिय युवा दिवसको अवसरमा जिल्ला युवा समिति मकवानपुरले हेटौँडामा गरेको कार्यक्रममा बोल्दै मन्त्री दुलालले युवाहरुलाई आत्मनिर्भर बनाउँदै समृद्धि हासिल गर्नुपर्ने भन्दै यसका लागि रोजगारी सिर्जना गर्नु जरुरी रहेको धारणा राखेका थिए । भाषणले मात्रै देशमा रोजगारी सिर्जना नहुने उनको भनाई थियो । रोजगारीको अवसर सिर्जना गर्न युवाहरुको प्रतिभाको संरक्षण र सिर्जनशिलताका लागि राज्यको लगानी आवश्यक रहेकोमा उनले जोड दिए ।
उनले युवाहरुमा रहेको प्रतिभाको पहिचानका लागि युवा बैज्ञानिक कोषको स्थापना गर्न प्रदेश सरकारले १० करोड विनियोजन गरेको बताए । कोषमार्फत युवाहरुको विभिन्न क्षेत्रका प्रतिभाको पहिचान गर्दै यसको उपयोग प्रदेशको विकासमा लगाउनुपर्ने मन्त्री दुलालको भनाई थियो । 
जिल्ला युवा समितिका अध्यक्ष सन्तोष चौलागाईको सभापतित्वमा भएको कार्यक्रममा शिक्षा विकास तथा समन्वय इकाई मकवानपुरका उपसचिव शम्भुप्रसाद पौडेल, घरेलु तथा साना उद्योग कार्यालयका प्रमुख चन्दन अमात्य, जिल्ला खेलकुद विकास समितिका कार्यालय प्रमुख खुशराज दाहाल, युवा अभियन्ता जीवन शर्माले कार्यपत्र अवधारणापत्र प्रस्तुत गरेका थिए ।