प्रदेश संसदको अधिकार खोस्न खोजेको आरोप

२८ साउन, हेटौँडा । २४ दिनपछि बसेको प्रदेश नम्बर ३ को प्रदेशसभा बैठकमा सोमबार ३ वटा विधेयकमाथि सैद्धान्तिक छलफल सकिएको छ ।

प्रदेश सभा बैठकमा सोमबार प्रस्तुत भएका ३ वटा विधेयक प्रस्तुत भएका थिए । प्रदेशसभामा भूमि व्यवस्था, कृषि तथा सहकारी मन्त्री दावादोर्जे लामाले ‘प्रदेश दुग्ध विकास बोर्ड स्थापना गर्न बनेको विधेयक र आन्तरिक मामिला तथा कानून मन्त्री शालिकराम जम्कट्टेलले ‘प्रदेश सभा सचिवालय सम्बन्धमा व्यवस्थापन गर्न बनेको विधेयक’ र ‘प्रदेश प्रशासकीय कार्यविधि (नियमित गर्ने) सम्बन्धमा व्यवस्था गर्न बनेको विधेयक’ प्रस्तुत गरेका थिए ।

प्रदेशसभा बैठकमा प्रदेश प्रशासकीय कार्यविधि सम्बन्धी विधेयकमाथि प्रदेशसभा सदस्य राधा घले र रमेश पौड्यालले प्रस्तुत गरेको विरोधको सूचना बहुमतले अस्विकृत भएको थियो । प्रदेशसभा बैठकमा प्रदेश मामिला समितिका सभापति माधवप्रसाद पौडेलले ‘मूख्य न्यायाधिवक्ताको काम, कर्तव्य र अधिकार तथा सेवाको शर्त सुविधाका सम्बन्धमा व्यवस्था गर्न बनेको विधेयक’ माथि समितिले बनाएको प्रतिवेदन प्रस्तुत गरेका थिए । सभालाई सभामुख सानुकुमार श्रेष्ठले प्रदेशसभा नियामावली संशोधन समितिको म्याद १५ दिन थपेको जानकारी दिएका थिए ।

प्रदेश प्रशासकीय कार्यविधिसम्बन्धी विधेयकमाथि छलफल गर्दै प्रतिपक्ष दलका प्रदेशसभा सदस्यहरुले संसदको अधिकार खोसेर प्रदेश सरकारले दुई तिहाईको दम्भ देखाउन खोजेको बताएका थिए । उनीहरुले प्रदेश दुग्ध विकास बोर्ड कार्यकर्ता भर्ति गर्ने उद्देश्यले आएको भन्दै विरोध गरेका थिए । बैठकमा प्रदेश सभा सचिवालय सम्बन्धी विधेयकमाथिको छलफलमा भाग लिने प्रदेशसभा सदस्यहरुले विधेयक ढिलो आएको भन्दै आलोचना गर्दै सचिवालयलाई समावेशी बनाउन सुझाव दिएका थिए ।