‘सामुदायिक वनमाथि निरन्तर प्रहार’

भीमसेन पौडेल
१४ असोज हेटौडा । सामुदायिक वन उपभोक्ता महासंघ (फेकोफन) की केन्द्रीय महासचिव भारती पाठकले राज्यबाट सामुदायिक वन माथि निरन्तर प्रहार भैरहेको बताएकी छिन् । हेटौँडा रेन्जपोष्ट महासंघले विजयादशमी, शुभ दीपावली, नेपाल सम्वत तथा छठ पर्वको अवसरमा शुक्रबार आयोजना गरेको शुभकामना आदानप्रदान कार्यक्रममा बोल्दै राज्यले सामुदायिकका मुद्धालाई वेवास्ता गर्दै निरन्तर हस्तक्षेप गरेको बताईन् ।
वन ऐन २०४९ संसोधन गर्न नहुने बताउँदै महासचिव पाठकले राज्यले सामुदायिक वनलाई अधिकार सम्पन्न बनाउन नचाहेको आरोप लगाईन् । सामुदायिक वनले उद्यम विकासलाई अगाडी बढाउनु पर्नेमा जोड दिदै उनले समूहमा रहेको विपन्न वर्गको हितमा अधिकतम कार्यक्रम ल्याउनु पर्ने बताईन् ।
 हेटौँडा रेन्जपोष्ट महासंघका अध्यक्ष शम्भु भण्डारीको अध्यक्षतामा भएको कार्यक्रममा फेकोफन मकवानपुरकी अध्यक्ष पञ्चमाया स्याङ्गतान, हेटौडा ईलाका वन कार्यालयका सहायक वन अधिकृत अरुणकुमार तिवारी, नवलपुर सरस्वती बसामाडी सामुदायिक वनका अध्यक्ष माधवप्रसाद सुवेदी,हेटौडा रेन्जपोष्ट महासंघकी महासचिव आरती पाठक, महासंघ सचिवालय सदस्य देवीप्रसाद दाहाल, रामहरी चौलागाई,वडा नागरिक मञ्च ११ नं. वडाका संयोजक फूलमान श्रेष्ठ, एमाले ११ नं. वडाका अध्यक्ष कृष्णप्रसाद उप्रेती लगायतले मन्तव्य व्यक्त गरेका थिए ।
हेटौडा रेन्जपोष्ट महासंघको घुम्ती बैठक बस्ने परम्परा अनुसार कार्यक्रमको व्यवस्थापन नवलपुर सरस्वती सामुदायिक वनले गरेको थियो । कार्यक्रममा हेटौडा ईलाका वन कार्यालय अन्तरगत रहेका २० वटा सामुदायिक वनका प्रतिनिधिहरुको सहभागिता थियो ।