प्रेस तथा अभिव्यक्त स्वतन्त्रता विरुद्धको प्रावधान परिमार्जन गर्न माग 

११ भदौँ, हेटौँडा । भदौ १ गतेबाट लागु भएको मुलुकी (देवानी) संहिता २०७४ प्रेस तथा अभिव्यक्ति स्वतन्त्रतालाई कुण्ठीत गर्ने गरी आएको भन्दै मकवानपुरका संचारकर्मीहरुले परिमार्जनका लागी माग गरेका छन् ।
नेपाल पत्रकार महासंघ प्रदेश ३ समिति र नेपाल पत्रकार महासंघ मकवानपुरको संयुक्त आयोजनामा भएको कार्यक्रममा मुलुकी (फौजदारी) संहिता, मुलुकी (देवानी) संहिता २०७४ मा गोपनीयताको हक’ विरुद्ध कसुर सम्बन्धि प्रेस तथा अभिव्यक्ति स्वतन्त्रतामा संकुचनबारे छलफल गरिएको थियो ।
कार्यक्रममा नेपाल पत्रकार महासंघ प्रदेश नम्बर ३ का  अध्यक्ष प्रताप विष्टले संविधानमा लेखिएको प्रेस तथा अभिव्यक्ति स्वतन्त्रतालाई कुण्ठित गर्ने गरी आएको ऐन परिमार्जन गर्नुपर्ने बताए । उनले पत्रकारका लागि पत्रकार आचार संहिता रहेको उल्लेख गर्दै ऐनले पत्रकारको स्वतन्त्रता खोस्न नपाउँने बताए । 
यस्तै पत्रकार महासंघ मकवानपुरका पूर्व अध्यक्ष राममणी दाहालले ऐन पञ्चायतकालको झल्को दिने किसिमको भएको आरोप लगाए । 
नेपाल पत्रकार महासंघ मकवानपुरका अध्यक्ष हरि हुमागाईको सभाध्यक्षतामा भएको छलफल कार्यक्रममा नेपाल पत्रकार महासंघ ३ नम्बर प्रदेशका महासचिव कृष्ण सारुमगर, अधिवक्ता धु्रवप्रसाद चौलागाई, जिल्ला बार एसोयिशन मकवानपुरका उपाध्यक्ष ऋसी केबी, पत्रकार महासंघ मकवानपुरका उपाध्यक्ष कुमार अधिकारी लगायत सञ्चारकर्मीको उपस्थिती रहेको थियो ।