बाल अधिकार सुनिश्चित गर्न प्रतिबद्ध छौः अध्यक्ष लामा

२९ भदौ, हेटौँडा । भीमफेदी गाउँपालिकाका अध्यक्ष हिदम लामाले संविधानले व्यवस्था गरेको बाल अधिकारलाई समयमा प्रत्याभूत गर्नुपर्ने बताएका छन् । 
नेपाल बाल संगठन, मकवानपुर र भीमआधार सामुदायिक स्कुल, भीमफेदीको संयुक्त आयोजनामा शुक्रबार हाजिरजवाफ तथा खेलकुद प्रतियोगिताका विजयी विद्यार्थीहरुलाई पुरस्कृत गर्दे अध्यक्ष लामाले यस्तो बताएका हुन् । उनले यस्ता प्रतियोगितात्मक कृयाकलापले विद्यार्थीहरुलाई उत्साह मिल्ने बताए । 
उनले जनचेतना अभाव र आर्थिक अभावमा बालहिंसा, बालश्रमलगायतका समस्या रहेको बताउँदै आर्थिक अभावकै कारण संविधानमा व्यवस्था भएअनुसारको बालअधिकार र संरक्षणका कामहरु हुन नसकेको बताए । 
बाल संगठनद्धारा सञ्चालित बालगृह व्यवस्थित र बालमैत्री रहेको भन्दै अध्यक्ष लामाले बाल गृहमा रहेका कानुनी जटिलताको समाधान गरी बालबालिकाको अभिभावकत्व ग्रहण गर्न तयारको बताउँदै बालबालिकाको सबै प्रकारका अधिकार सुनिश्चित गर्न गाउँपालिका प्रतिबद्ध रहेको उल्लेखगरे । 
गाउँपालिकाकी उपाध्यक्ष पार्वती रानाले असल नागरिक बनाउन बाल अवस्थादेखिनै संरक्षण र रेखदेख आवश्यक हुने भन्दै बालबालिकालाई बाल हिंसाबाट जोगाउनसकेमा बाल दिवश मनाउनुको सार्थकता रहने बताईन ।
संगठनका अध्यक्ष रमेश गिरिको अध्यक्षतामा भएको कार्यक्रममा भीमफेदी गाउँपालिका वडा नम्बर ६ का अध्यक्ष सीताराम थापा, कार्यक्रम संयोजक कृष्ण नकर्मीलगायतले बाल अधिकारको बारेमा आफनो धारण राखेका थिए । 
बाल संगठनद्धारा संचालित बाल मन्दिर परिसरमा आयोजित कार्यक्रममा भीमफेदी गाउँपालिकाका अध्यक्ष हिदम लामा, उपाध्यक्ष पार्वती राना, बाल संगठनका अध्यक्ष रमेश गिरि, समाजसेवी एवं संगठनका सल्लाहकार कन्यैयाकृष्ण लगाएतको उपस्थिति रहेको थियो । बाल मन्दिरमा हाल अनाथ तथा असहाय ३१ जना बालबालिका आश्रित रहेका छन् । दोश्रो जन आन्दोलन २०६३ पश्चात् नेपाल सरकारले बालअधिकार सम्बन्धी महासन्धीलाई अनुमोदन गरेको दिन प्रत्येक वर्ष भदौ २९ गतेलाई बाल दिवसको रुपमा मनाईँदै आएको छ ।