‘३ दिनमा सूचना नदिए कारवाही’

१६ असोज, हेटौँडा । राष्ट्रिय सूचना आयोगले दिएको आदेश पालना नगरे नेपाल बिधुत प्राधिकरण क्षेत्रिय कार्यालय हेटौडाका प्रमुख र सूचना अधिकारीलाई कानुन अनुसार कारवाही गर्ने जनाएको छ । पत्रकार समेत रहेका आमभन्ज्याङका हरि हुमागाँईले मागेको सूचना ३ दिन भित्र उपलब्ध नगराएमा कार्बाही गर्ने आयोगले आदेश दिएको हो । 
आयोगले बिधुत प्राधिकरण क्षेत्रिय कार्यालय हेटौडाका प्रमुख ईन्जिनियर पद्माकान्त झा र सूचना अधिकारीलाई तीन दिन भित्रमा सूचना उपलब्ध नगराएमा सूचनाको हक सम्बन्धी ऐनको दफा ६४ को उपदफा ३२ अनुसार कार्बाही गर्ने बताएको छ । आयोगले आदेश दिदा समेत सूचना उपलब्ध गराउनका लागि किन आनाकानी गरेको हो ? सूचनाको हक सम्बन्धी ऐन २०६४ अनुसारको सजाय तर्फ आयोगले प्रकृया किन अगाढी नबढाउने ? जस्ता प्रस्न राख्दै आइतबार फेरि ३ दिनको म्याद दिएर आदेश जारी भएको हो ।

राष्ट्रिय सूचना आयोग प्रमुख सूचना आयुक्त कृष्णहरि बाँस्कोटा, सूचना आयुक्तहरु यसोदादेबि तिम्सिना र किरणकुमार पोख्रेलले यो आदेश जारी गरेका हुन् । आयोगले आदेश दिंदा समेत सूचना उपलब्ध नगराएपछि हुमागाँईले कार्बाहीको माग गर्दै असोज १२ गते आयोगमा उजुरी दर्ता गराएका थिए ।