समिति सभापतिको निर्वाचन असोज ५ गते

२ असोज, काठमाडौँ । प्रतिनिधिसभाका १० वटा विषयगत समितिका सभापतिको निर्वाचन असोज ५ गते हुने भएको छ । प्रतिनिधिसभाको सोमबारको बैठकमा सभामुख कृष्णबहादुर महराले यसबारे जानकारी दिएका हुन् । 
सत्तारूढ दल नेकपा र प्रमुख प्रतिपक्षी कांग्रेसबीच भागबन्डा नमिल्दा समिति गठनमै ढिलाइ भएको थियो । संघीय संसद्मा प्रतिनिधिसभामा १०, राष्ट्रिय सभामा ४ र संयुक्त २ समेत १६ वटा समिति छन् । कांग्रेसले दुवै सभामा गरी आफूहरूको उपस्थिति एक चौथाइ हाराहारी रहेकाले त्यही संख्यामा नेतृत्व पाउनुपर्ने अडान राखेको छ । कांग्रेसले प्रतिनिधिसभामा २, राष्ट्रिय सभामा १ र एउटा संयुक्त समितिको नेतृत्वमा दाबी गरेको छ ।
भदौ १२ मा भएको राष्ट्रिय सभाका चारवटा समितिको निर्वाचनमा कांग्रेसले एउटाको नेतृत्व पाएको छ । प्रतिनिधिसभामा अर्थ, अन्तर्राष्ट्रिय सम्बन्ध, उद्योग तथा वाणिज्य र श्रम तथा उपभोक्ता हित, कानुन, न्याय तथा मानव अधिकार, कृषि सहकारी तथा प्राकृतिक स्रोत, महिला तथा सामाजिक, राज्य व्यवस्था तथा सुशासन, विकास तथा प्रविधि, शिक्षा तथा स्वास्थ्य र सार्वजनिक लेखा समिति छन् । तर प्रतिनिधिसभाका समितिमा कांग्रेसलाई लेखा समितिको मात्रै नेतृत्व दिने पक्षमा नेपाल कम्युनिष्ट पार्टी (नेकपा) रहेको छ ।