अबको यात्रा सुशासन र आर्थिक समृद्धितर्फ : मुख्यमन्त्री पौडेल

३ असोज, हेटौँडा । प्रदेश नम्बर ३ सरकारले चौथो संविधान दिवस हेटौँडामा मनाएको छ । दिवसको अवसरमा हेटौँडामा प्रभातफेरीको आयोजना गरिएको हो । 
हेटौँडाको भुटनदेवी स्कूल चौरबाट शुरु भएको प्रभातफेरी बजारका विभिन्न भाग परिक्रमा गरी मकवानपुर बहुमुखी क्याम्पसमा पुगेर समापन भएको थियो । समापन कार्यक्रममा बोल्दै प्रदेश नम्बर ३ का मूख्यमन्त्री डोरमणी पौडेलले अहिले संविधान कार्यान्वयनको चरणमा रहेकोले सबै क्षेत्रको सहयोग अपरिहार्य रहेको बताए । राजनीतिक लडाइको यात्रा सम्पन्न भईसकेको बताउँदै उनले अबको यात्रा सुशासन र आर्थिक समृद्धिको भएको बताए । 
तीन तहको सरकारको कार्याभार अनुसार प्रदेश सरकारले विकासको काम संगै कानून निर्माणको कामलाई तिब्रता दिएको मूख्यमन्त्री पौडेलको भनाई थियो । आन्तरिक मामिला तथा कानून मन्त्री शालिकराम जम्कट्टेलले सबैको रगत, पसिना बगेर अहिलेको उपलव्धी हासिल भएको भन्दै संविधान कार्यान्वयनमा जुट्न आग्रह गरे । 
दिवसको अवसरमा जनआन्दोलन २०६२/०६३ का सहिद बासुदेव घिमिरे र जनयुद्धका सहिद रुद्र पाख्रिनका परिवारलाई सम्मान गरिएको थियो । दिवसको अवसरमा विभिन्न समुदायका झाँकी एवं संस्कृति प्रर्दशन गरिएको थियो । कार्यक्रममा प्रदेशका सभामुख सानुकमार श्रेष्ठ, उपसभामुख राधिका तामाङ, मन्त्री, प्रदेशसभा सदस्य, जनप्रतिनिधि, कर्मचारी, सुरक्षा निकायका प्रतिनिधि, टोल विकास संस्थाका प्रतिनिधि लगायतको सहभागिता रहेको थियो ।