मूख्यमन्त्रीले भने–प्रदेश राजधानी हेटौँडामै राख्न सहयोग गर्नुस्

७ असोज, हेटौँडा । प्रदेश नम्बर ३ का मूख्यमन्त्री डोरमणी पौडेलले प्रदेश राजधानी हेटौँडामा कायम गर्न सहयोगका लागि संचारकर्मीसंग आग्रह गरेका छन् । 

न्यूज क्लव नेपालको हेटौँडामा आइतबार उद्घाटन गर्दै मूख्यमन्त्री पौडेलले ३ नम्बर प्रदेशको राजधानी हेटौँडामा नै हुनुपर्ने बताए । उनले अहिले बहुसंख्यकको धारणा राजधानी हेटौँडा हुनुहुँदैन भन्ने रहेको बताउँदै संचारमाध्यमले हेटौँडा नै के कारणले उपयुक्त त भन्ने विषयलाई बाहिर ल्याउनुपर्नेमा जोड दिए । प्रदेश सरकारले अहिले काम गर्ने बाटो बनाउने काम गरिरहेको भन्दै केही समयपछि देखिने गरी काम हुने दावि समेत गरे । 

सरकारले सुखि नेपाली, समृद्धि नेपालको लक्ष्यका साथ काम गरिरहेको बताउँदै उनले राज्यले लिएको मिसनलाई आफ्नो मिसन बनाउन पनि संचारकर्मीहरुलाई आग्रह गरे । परिवर्तनको पक्षमा सधै लडिरहने संचारकर्मीहरुले परिवर्तनलाई संस्थागत गर्नका लागि पनि महत्वपूर्ण भूमिका निर्वाह गर्नुपर्ने उनको भनाई थियो ।

कार्यक्रममा प्रदेशसभा सदस्य प्रेमबहादुर पुलामी, नेकपाका नेता श्रीधर पोखरेल, नेपाल पत्रकार महासंघ मकवानपुरका अध्यक्ष हरि हुमागाई, पत्रकार राजन दाहाल लगायतले मन्तव्य व्यक्त गरेका थिए । कार्यक्रम क्रियशन मिडिया एण्ड इभेन्ट प्रालिका अध्यक्ष धमेन्द्र दाहालको सभाध्यक्षतामा भएको थियो ।