स्वास्थ्य संस्था १० देखि ५ बजेसम्म संचालन गर्न पत्राचार

१७ असोज, हेटौँडा । मकवानपुरका स्वास्थ्य संस्था १० बजेदेखि ५ बजेसम्म संचालन गर्न जिल्ला स्वास्थ्य कार्यालय मकवानपुरले पत्राचार गरेको छ । सरकारले बहिरंग (ओपिडि) सेवा १० बजेदेखि ५ बजेसम्म दिने निर्णय गरेसँगै कार्यालयले मकवानपुरका सबै स्वास्थ्य संस्थालाई निर्णय अनुसार काम गर्न पत्रचार गरेको हो । 
मध्यमाञ्चल क्षेत्रीय स्वास्थ्य कार्यालयको असोज ९ गतेको पत्र अनुसार स्वास्थ्य कार्यालयले सोमबार जिल्लाका सबै स्वास्थ्य संस्थामा पत्राचार गरेको कार्यालयका जनस्वास्थ्य निरीक्षक भोला चौलागाईले बताए । उनका अनुसार ४ वटा प्राथमिक स्वास्थ्य केन्द्र, ४० स्वास्थ्य चौकी, ५ शहरी स्वास्थ्य केन्द्र र १ सामुदायिक स्वास्थ्य इकाईलाई पत्रचार गरिएको छ । विभिन्न स्थानमा संचालन भएका स्वास्थ्य क्लिनिकले पनि १० देखि ५ बजेसम्म सेवा दिने उनको भनाई छ । ‘सोमबार सबै इकाईलाई पत्राचार गरिएको छ, पत्र पुगेसँगै सबैले निर्णय कार्यान्वयन गर्छन् ।’–उनले भने–‘दशैं लगत्तै यसको अनुगमन समेत गरिनेछ ।’
क्षेत्रीय स्वास्थ्य निर्देशनालयले हेटौँडा अस्पताललाई पनि ओपिडि सेवा १० देखि ५ बजेसम्म संचालन गर्न पत्राचार गरेको छ । विगतमा १० बजेदेखि २ बजेसम्म संचालन हुने गरेको ओपिडि सेवा ७ महिनाअघि १० देखि ३ बजेसम्म विस्तार गरिएको थियो । वर्तमान सरकारले जनतालाई स्वास्थ्य सेवामा पहुँच बृद्धि गर्ने उद्देश्यले १० देखि ५ बजेसम्म सेवा विस्तारको निर्णय गरेको थियो ।

निर्णयले बढि भन्दा बढि सेवाग्राहीले सेवा पाउने नेपाल स्वास्थ्यकर्मी समाज नीजि विभाग संयोजक उत्सव चौलागाईले बताए । उनले सरकारको निर्णय कार्यान्वयन भए नभएको कडाईका साथ अनुगमन गर्न समेत सरोकारवाला निकायले चासो दिनुपर्नेमा जोड दिए ।