संघीय सरकारसंग प्रदेश सरकारलाई दाँज्न मिल्दैन : मूख्यमन्त्री पौडेल

File Photo

१५ असोज, हेटौँडा । प्रदेश नम्वर ३ का मुख्यमन्त्री डोरमणी पौडेलले संघीय सरकारसंग प्रदेश सरकारलाई दाँज्न नमिल्ने बताएका छन् ।
नेपाल पत्रकार महासंघ मकवानपुरको सोमबार हेटौँडामा भएको १५ औं वार्षिक साधारणसभामा बोल्दै मूख्यमन्त्री पौडेलले पुरानो संरचनासहितको संघीय सरकार र संरचना तयार नै नभएको प्रदेश सरकारलाई दाँजेर नहेर्न आग्रह गरेका हुन् । प्रदेश सरकार आफैं कानून बनाउँदै विकासे काममा लाग्नुपर्ने भएकाले काममा केही ढिलाई भईरहेको बताउँदै केही समयपछि यसको गति बढ्ने उनको भनाई थियो । संंचारकर्मीहरुले पनि प्रदेश सरकारको बाध्यतालाई बुझेर कलम चलाईदिन मूख्यमन्त्री पौडेलले आग्रह गरे । 
कार्यक्रममा प्रदेश नम्बर ३ का आन्तरिक मामिला तथा कानून मन्त्री शालिकराम जम्कट्टेलले संचारकर्मीले फोटो खिच्नै अनुमति लिनुपर्ने अवस्था आउनु राम्रो नभएको भन्दै यसलाई परिमार्जन गर्न सकिने भएपनि तत्कालै नयाँ अपराध संहिता संशोधनका लागि दवाव दिनु अनुपयुक्त हुने जिकिर गरे ।
नेपाल पत्रकार महासंघ मकवानपुरका अध्यक्ष हरि हुमागाईको अध्यक्षतामा भएको कार्यक्रममा प्रदेश नम्वर ३ का प्रदेशसभा सदस्यहरु मुनु सिग्देल, प्रेम बहादुर पुलामी, हेटौडा उपमहानगरपालिकाका प्रमुख हरिबहादुर महत्त, भीमफेदी गाउपालिकाका प्रमुख हिदम लामा, प्रमुख जिल्ला अधिकारी अस्मान तामाङ, उद्योग संघ मकवानपुरका अध्यक्ष नवराज अर्याल , मकवानपुर उद्योग बाणिज्य संघका अध्यक्ष कृष्ण कटुवाल, पत्रकार महासंघ प्रदेश नम्वर ३ का अध्यक्ष प्रताप विष्ट, पत्रकार महासंघ मकवानपुरका पूर्व अध्यक्ष राममणी दाहाल लगायतले मन्तव्य व्यक्त गरेका थिए ।
कार्यक्रममा पत्रकार महासंघ मकवानपुरका सस्ंथापक अध्यक्ष न्हुच्छेमान श्रेष्ठको स्मृतिमा स्थापना गरिएको न्हुच्छेमान श्रेष्ठ स्मृति पत्रकारिता पुरस्कारबाट नेपाल समाचार पत्रका संवाददाता रोशन पराजुलीलाई प्रदान गरिएको थियो ।