तामाङ प्राज्ञ सभाको वार्षिक साधारणसभा सम्पन्न

२० असोज, हेटौँडा । तामाङ प्राज्ञ सभाको १२ औं वार्षिक साधारण सभा शुक्रबार हेटौँडामा सम्पन्न भएको छ । हेटौँडा २ वनस्खण्डीमा अवस्थित नागरिक भवनमा भएको साधारणसभाले प्राज्ञ सभाको कार्य योजनाहरु समेत निर्माण गरेको छ ।
तामाङ प्राज्ञ सभाका अध्यक्ष श्याम प्रसाद लामाको सभाध्यक्षता तथा प्रदेश नम्बर ३ की उपसभामुख राधिका तामाङको प्रमुख आतिथ्यतामा सभा सम्पन्न भएको हो । कार्यक्रमको उद्घाटन गर्दै तामाङले प्राज्ञ सभाले नयाँ नेतृत्व पाएसँगै सक्रियता पूर्वक कार्यहरु गर्दै आएकोमा खुशी व्यक्त गरिन् ।
समानुपातिक सिद्धान्तका आधारमा राजनीतिमा तामाङ समुदायको उपस्थिति सक्रिय देखिएता पनि प्रशासन तथा अन्य क्षेत्रमा निकै कमजोर उपस्थिति रहेको औँल्याउँदै उपसभामुख तामाङले सबै तामाङहरु एकजुट भएर लाग्नुपर्ने बताईन् ।
सभाका अवसरमा मकवानपुरका प्रमुख जिल्ला अधिकारी अस्मान तामाङलाई फुलमाला लगाएर स्वागत समेत गरिएको थियो । कार्यक्रममा प्रदेश नम्बर ३ का प्रदेशसभा सदस्य सांसद ओमबहादुर घलान, भाषाविद अजितमान तामाङ, संस्थाका सल्लाहकार तथा विश्व किर्तिमानी हिमाल आरोही शम्भु तामाङ लगायतले मन्तव्य दिएका थिए । त्यस्तै संस्थाका कार्य समिति सदस्य फत्तेमान लामाले स्वागत मन्तव्य राखेका थिए । कार्यक्रम संस्थाकी कोषाध्यक्ष कुमारी वाईबाले संचालन गरेकी थिईन् । कार्यक्रममा तामाङ बुद्धिजीविसहित अन्य विभिन्न संघसंस्थाका प्रतिनिधिहरुको सहभागिता रहेको थियो ।